Shillong, Rymphang 02 : Ka kyrtong jong ka NPP na Nongshken Kong Grace Kharpuri ka la ong ba ka jingkhlain ka social media ka la long kaba i shyrkhei bha khamtam lei lei haba iadei bad ki khubor ban ïalam bakla ia ki paidbah ha ka por elekshon.
Haba kren bad ki lad pathai khubor, ka Kong Grace kaba la jop haduh lai sien kum ka MDC bad aireng biang ha kane ka elekshon kaban long shen, ka la ong ruh ba kane ka jingjur ka social media ka long kaba i shyrkhei lada jia ba ki paidbah kim nang ban bishar bniah.
Watla ka party NPP ka la leh shibun na bynta ka jylla haba iadei bad ka roi ka pa hynrei dang don pat ki briew kiba dang pyrshang ban ïalam bakla. Kane ka dei ka buit jongno re jong no kiba kwah ban knieh noh ia ka bor na ka NPP namar ki ïohi ba ka dei ka party kaba la trei bha ym tang mynta hynrei naduh u snem 2018,” ka la ong.
Haba kren pat halor ka jingjur ki jingkynthoh ha ki social media ka la ong, “Kine ki social media ki la pynjot shisha ia kane ka sainpyrthei. Ha ki snem ba la dep ngam da ïohi than ba ki social media kan long haduh katne katne. Mynta ki la ïalam bakla lut lyngba ki social media.”
Kumta, ka Kong Grace ka la ong ba kum ka nongmihkhmat kam sa salia than ia ki Social Media namar ka leit sha u paidbah da ka mynsiem kum ka briew kaba la trei hok kum ka MDC naduh ba ka jop bad ka ai lut khlem da tyngkai ia ka por ne ka bor.
Ym tang ba nga shakri ia ki paidbah ka constituency hynrei kum ka Executive Member nga la ioh ruh ban don bynta bad noh synniang ha kaban thaw bad wanrah bun tylli ki aiñ kiba dei na bynta ka jingmyntoi jong ki paidbah ka rilum Khasi la ka long naduh ki aiñ ban khanglad ia ka jingshah ot kilo, ka aiñ ban pynkup bor ia ki Rangbah Kur, ki seng samla ki seng longkmie bad ruh haba iadei bad ka aiñ ba iadei bad ka khyndew ka shyiap,” ka la ong.
Ha kawei pat ka liang ka la ong ba ka sngewkmen ba ka ioh ban mihkhmat ia ka Nongshken constituency namar ki paidbah kane ka thaiñ ki dei kiba shi sur bad kiba don ka mynsiem sngewnguh.
Lah ban kdew hangne ba ka Kong Grace ka la jop haduh lai sien ban ban kum ka MDC na ka Nongshken constituency bad kane kadei ka sien iakhun kaba saw kum ka kyrtong MDC.
