Nga ïakhun pyrshah ïa u President ka VPP, kam dei pyrshah ïa u kyrtong ka VPP : Lambor Malngiang

Shillong, Rymphang, 01: U Siting MDC jong ka Nongkrem Constituency u Bah Lambor Malngiang uba ïakhun ha kane ka kynti kum u kyrtong Independent u la thep kyrteng ha ka Sngi Saitjaiñ ban aireng biang ïa ka elekshon MDC sha ka Iingdorbar Thawain jong ka Khasi Hills Autonomous District Council (KHADC) ka ban sa long shen myna u bnai.
Ha ka jingïakren bad ki lad pathai khubor, u Bah Lambor u la ong, “ha kane ka elekshon nga ïakhun pyrshah ïa u President ka VPP, kam dei ba nga pyrshah ïa u kyrtong ka VPP.”
“Kaba donkam mynta ka long ba ngin ïatrei shitom lang baroh kiba don hangne (ban synran ïa nga) bad kiba don sha ka Constituency. Ïa kaba la leit ka la leit, ngim kwah ban ïa khyllie syrtap shuh hynrei kaba donkam nangne shakhmat ka long ban trei shitom ban wanrah biang ïa ka jingjop, ban wanrah biang ïa ka jingshngaiñ ki paidbah kiba don hapoh ka thaiñ jong ngi,” u la bynrap.
U la ïathuh ruh ba ha ki san snem baladep kum u MDC jong ka Nongkrem Constituency u la leh bun ki kam pynroi wat khamtam ha ka por ba la wan lynshop ka jingpang khlam Covid-19 ar snem. “Nga la pyrshang ban leh ïa ki kam ba bha hapoh ka thain baroh kawei bad nga ngeit skhem ba kane ka lynti ïaid jong ngi ka long ka jingkieng ba ngin ïoh shwa ïa ka jingjop bad kan long ka jingkieng sha ki snem ki ban sa wan,” ong shuh shuh u Bah Lambor.
“Haba ngi ïa sei nia ha ka rynsan ïalap elekshon, tang na ka daw ba ngi ïa sei ïa ki nia ki jutang hakhmat ki paidbah, hynrei ka la don jingujor case pyrshah ïa nga da u MLA bad dawa na nga ruh da ki klur ban siew. Kam pher, ngin ïai tyllun ha ki kam bad ngin dang ïai trei shakhmat khlem da shongthait khlem da riej,” la ïathuh u Bah Lambor.
U la ong ruh ba ka jingïakhun jong u ïa ka elekshon kam dei satia ka jingkwah jong u shimet hynrei ka dei lyngba ka jingïamir jingmut lang bad ki paralok hapoh ka Constituency kumno ban leh. “Ka sur ka wan, ngi kwah biang ïa phi ba uto ujuh u shab uba la pynpyrnai ïa ka Constituency ki ong ieng biang na u Mawlynnai,” ong u Bah Lambor.
Da kaba ïathuh ïa ki jingtreikam jong ka District Council ha ka samoi ba la leit noh, u Bah Lambor u la ong, “ngin pynkhlaiñ shuh shuh ïa ka District Council hapoh ka Khyrnit Bahynriew bad dang shen ngi la mynjur bun tylli ki Aiñ-rew bad ngin dang leh shuh shuh ïa ki kam babha ban ïada ïa ka bri u hynniewtrep.”
Halor ka Article 371, u Bah Lambor u la ong, “ha Mizoram ka la ïoh ïa ka Article 371 hynrei ka MMDR Act haduh mynta ka dang treikam ha ka jylla Mizoram. Lada ong ban wanrah ïa ka Article 371 ka pyni shai ba ka aibor shuh shuh pynban ïa ka Sorkar Jylla ba kan kham ïa ka bor kaba ngi ïoh laitluid. Ngi ngim kwah ïa kata. Kaei kaba ngi don ngin dang pynbha ïa ka.”
Haba kynthoh ïa ka jingresaiñ jong u Bah Ardent M. Basaïawmoit na ka kam MDC, u Bah Lambor u la ong, “u President u la resaiñ ïalade kum u MDC ka pyni shai sha kiba bun balang ba ka dang duna ka jingmut jingpyrkhat ha kito ki nongïalam.”
“Ha u bnai Risaw, 2015, la kdew shai ha ka Resolution ba la wanrah da u President jong ka VPP hapoh ka Ingdorbar Thawain ïa kaba la kren shai ba ka jingdon jong ki Dolloi, ki Syiem, ki Rangbah Shnong ki dei ki mawjynthud ïa ka ïoh ka kot. Lada ym don ki Syiem, ki Dorbar Shnong, ki Rangbah Shnong, ki Dolloi, ki Hima, mano ban pynïaid? Ka mut ka jaidbynriew ka la sakma. Dei namarkata, ngi kwah ban kren da kaba shai, pynneh ïa kaei kaba ngi don, pynneh shuh shuh ïa ka,” u la bynrap.