Shillong, Rymphang 01: U nongïalam ka UDP bad u Myntri ka sorkar jylla u Bah Paul Lyngdoh ha ka sngi Thohdieng u la kam ba ki jingjop jong ka EC kaba 3 snem shiteng ba la ïalam da ka UDP hapoh Khasi Hills Autonomous District Council (KHADC) ka la long kum kawei na ki kam kiba khraw.
Haba kren sha ki lad pathai khubor u Bah Lyngdoh u la ong ha kajuh ka por ba dei ka EC ba la ïalam da ka UDP kaba la wanrah ïa ka aiñ tei ïing ne building byelaws hapoh ka KHADC.
“Ha shwa kane, baroh ki application pan jingbit ban shna ïing ki ïaid lyngba jong ka MUDA. Mynta ngi la don ïa ka Building Regulatory Authority, ha kaba kane ka la nohsynniang bha sha ka khajna jong ka council,” u la ong.
“Kadei ruh ha ka samoi treikam jong ngi ba ngi la pynsuk ïa shibun bha ki nongshong shnong kiba leit shim ram shna ïing. Kadei lyngba ka jingsdang jong ngi ba ngi la mynjur ba kin ïoh ïa kine ki lad jingmyntoi bad mynta malu mala ki la don haduh 500 tylli ki application kiba la ïoh ka lad ban ki jingmyntoi lyngba ki bank lyngba ki syrnot ba la pynmih da ka KHADC,” bynrap u Bah Lyngdoh.
“Kumta ki jingjop ki la long kiba khraw hynrei thikna ba kin sa wan bad ki thup jong ki kam jingpyndep katba ngi nangjan sha ki elekshon,” pynthikna u nongïalam ka UDP.
Haba ïadei bad kiwei pat ki seng saiñ pyrthei, u Bah Lyngdoh u la ong, “Baroh kaba nga lah ban ong ka dei kaba ngi ïaid bad kren. Ngi ngeit ba ngi pynïaid shaphrang ïa ki agenda jong ngi lyngba ki kam kiba shai. Ngim ju ngeit ha ki kam ban lum bun briew ha ki jingïalang, ban pynshit ïa u paidbhur bad ban kyrpad ïa ki nongrim kiba ngim lah ban ngeit ha kata. Ngi ngeit ban don ha ki jingjop jong ki agenda kiba lah ban mih ki kam kiba lah ban ïohi ha ka jylla bad ha madan.”
