Shillong Jylliew, 10: Ka Samla Bahunlang Mawrie kaba la pas ha ka Second Position jong ka resol Higher Secondary School Leaving Certificate (HSSLC) ba la pynbna da ka Meghalaya Board of School Education (MBoSE) ha ka sngi Thohdieng ka la pynpaw ïa ka jingangnud ban long riewniam.
Ka samla Bahunlang kaba pule ha Auxillium Higher Secondary School, Shillong ka basah ha ka shnong Madaryting, Shilllong ka la pynpaw ïa ka jingsngewkmen haduh katta katta halor kane ka jingïoh khet ïa u soh ka jingjop.
“Nga dap da ka jingsngewnguh ïa u Blei namar ha ka por ba nga duh jingkyrmen dei ma U, Uba ai jingkyrmen ïa nga ba ngan ym kynran dien watla bun ki jingeh,” la ong ka Samla Bahunlang.
“Ka pyrthei kan sa ong ba kito kiba pas ha ka kyrdan Top Ten kin sa kwah ban long doktor, ban long engineer, hynrei ïa nga shimet ngam sngewtynnat ïa kita hynrei ïa nga mynta nangne ngan dang ïai bteng ïa ki jingpule namarba nga kwah ban long Sister bad kata ka dei ka jingthrang jong nga bad ka dei ruh ka jingkhot jong u Blei,” ka la ong.
“U Blei u trei ha ki rukom bym lah ban mutdur bad ngam lah ban sngewthuh,” ka la ong bad bynrap, “hynrei ïa nga nga kwah palat ban long Sister. Kata hi ka dei ka rai bad kata hi ka dei ka jingthrang jong nga.”
Ka skul Auxillium Higher Secondary School ka dei kaba la pynïaid da ki Sister jong ka Jingïasyllok FMA ka Balang Catholic.
Haba kylli, ka la ong, “lada nga thait ban khreh kot ngi dei ban kylla ïa ka rukom khnang ba ngin dup sngewtynnat ban khreh ïa ka kot. Lada ngi thait ban pule ïa kawei ka sobjek, ngi dei ban pule bujli da kawei pat ka sobjek bad ngi dei ban thaw buit hi dalade kumno ban khreh kot namarba lada shu khreh shi khreh ïa ka kot kan pynbtai ïa ngi.”
Ka samla Bahunlang ka la ïathuh naduh ba ka dang rit ka dei ka khynnah skul kaba ju pas bha shakhmat ha ki jingpule bad ha ka eksamin SSLC ka la poi ha ka Top 20.
“Namarba nga sah ha Convent, ki Sister ruh hangne ki ju ïai ong ba phi lah beit. Ki kmie kpa jong nga hi ki dei kiba ju ai mynsiem ïa nga borabor,” ka la ong.
