Shillong Jylliew, 10: Uwei riewpaidbah ïa uba la tip kyrteng kum u Tipsuk Shabong uba shong basah ha Lumparing u la shah kem ha ki Pulit jong ka Laban Police Station hadien ba u la jrong kti ïa uwei u Pulit Traffic uba la tip kyrteng kum u J. Sangma katba u dang pynïaid ïa ki kali ha surok Red Cross, Laban ha ka sngi Thohdieng.
U Addl. Superintendent of Police (Traffic) ka East Khasi Hills District u Bah Ian O. Swer ha ka jingïakren bad u Mawphor u la ïathuh ba ha ka por kumba 2.40 baje nohphai sngi ba dang dei ka por wai skul bad khapngiah bha une u riewpaidbah uba niah ïa ka kali kaba don ïa u nombar ML-05 W-2777 uba wan na ka thaiñ Laban u la pynieng khlemakor ïa ka kali hapdeng surok Red Cross, Laban ban kiew sha Civil Hospital, Shillong kat haduh ba ka la wanrah ïa ka jingdheng kali bad ka jingkhapngiah kaba la pynwit ïa kiwei pat ki nongniah kali saw shaka bad ar shaka.
U la ïathuh ba ïa une u riewpaidbah la kem hadien ba u J. Sangma u la mudui da ka ejahar ha Laban Police Station bad ki Pulit ruh ki la rejister caser pyrshah ïa u Bah Tipsuk Shabong.
“Haba u Pulit Traffic u la phah kynriah ïa ka kali hynrei une u briew u la kynroi, u la kynhied bad u la pyrshang ruh ban jrong kti ïa u Pulit uba dang don ha ka kamram,” ong u Bah Swer.
Katkum ka Video ba la ïoh, la sakhi ïa ka jingleh donbor jong u Bah Tipsuk Shabong bad la ïohi ruh ïa ki nongniah kali kiba la ïarap ïa u Pulit Traffic bad kiba la pynrem jur ïa ka jingleh bakla ka jong u.
