Shillong, Jylliew 10: Ka Hynñiewtrep National Youth Front (HNYF) East Khasi Hills mynta ka sngi ka la bteng ïa ka jingleit khynra ïa ki dukan thoh tim. Kane ka jingleit khynra ka long hapoh ka jingïalam u General u Bah Donlang Nongbri ryngkat u Assistant Genral Secretary u Bah Tyllibor Swer, ha kaba ki la hiar ban leit khynra Licence ïa ki dukan thoh tim sa sha ki thaiñ Garikhana ban lap la kine ki dukan thoh tim ki biang ne em ki kot ki sla kaba ki dei ban pynbiang.
Ha kane ka jingjurip ka seng ka la lap ba baroh na ki dukan ba shong da ki bym dei ki Khasi kim don satia ïa ki licence bad ka seng ka ong ba ka lap tang katto katne hi kiba don licence kata ruh tang ki dukan ki Khasi.
Haba kren sha ki lad pathai khubor kine ki nongïalam ka HNYF ki la ong ba kane ka jingbym pynbiang ïa ki licence da ki dukan bad ka jingbym shimkhia ka sorkar ban pynbor ba ki dei ban pynbiang ka pynlong ïa ka jingduh ei da ki bun klur ka khajana ha ka shisnem kaba pynlong pat ïa ka jinghiran ka pla tyngka jong ka sorkar.
Kine ki nongïalam ka seng ki la dawa na ka sorkar lyngba ka tnad Taxation Department ba ki dei ban wan pyrkhing ïa kine ki dukan bad ba kam dei ban ailad ba kin plie khlem pat da ïoh ki license na ka sorkar. Hadien ba ka HNYF ka la hiar ban leit khynra Licence thoh tim ïa ki dukan thoh tim kaba ka la sdang na ki thaiñ Polo ka Khasi Hills Archery Sports Institute ka la byrngem ban ai da ka case pyrshang ïa ka seng ha ryngkat ki jingkynnoh ba kane ka jingleh ka HNYF East Khasi Hills ka long ban pynïohnong ïa kiwei pat ki nongsiat tim(organizer) na na liang ka HNYF ka la pynphai nia da kaba ong ba kane ka jingkhynra licence ka seng ka long beit ban pynthikna ba ki dukan thoh tim kin siew ïa ka khajna sha ka sorkar khnang ba kan long ka jingmyntoi ïa ka jylla.
Na ka liang ka HNYF ka la maham tyngeh ruh ïa ka Khasi Hills Archery Sports Institute ba kam dei ban kynnoh khlem nongrim bad ba ka seng kan ym shong kli kti hynrei ban bteng ïa ka jingkhynra. Shuh shuh ka HNYF ka la ong ba kane ka jingkynnoh ka Khasi Hills Archery Sports Institute ka long kum ban ïada ïa ki bym dei Khasi ban kamai spah sahuh khlem donkam siew ïa kino kino ki khajna sha ka sorkar. Ka HNYF ka la ong ruh ba da leilei ka seng kam riej hynrei kan bteng ban leh ia kane ka kam bad ba ka la long kaba la kloi ban ïakhun lada ka Khasi Hills Archery Sports Institute ka ai case pyrshah ïa ka ruh
