Shillong Jylliew, 10: U Director General of Police (DGP) ka Jylla u Dr.LR Bishnoi ha ka sngi Thohdieng u la ïathuh ba ka tnat Pulit ka jingtohkit haduh mynta ka dang ïaid shakhmat pyrshah ïa u Kpa uba la tip kyrteng kum u Joefreson Jana uba donkti ban dkhat jubor ïa ka jingim jong ki arngut ki khun kiba dang rit kaba la jia ha ka shnong Nongrah, Shillong ha ka miet 30 tarik, Jymmang.
“Ynda la ïoh ïa ka kaiphod tohkit ngan sa lah ban kren eiei,” ong u Dr. Bishnoi.
Ha ka 8 tarik mynta u bnai ka Committee on Women Empowerment jong ka Ingbishar Thawaiñ ka la khot hajir ïa u Director General of Police (DGP) ka Jylla bad ïa u Investigating Officer (IO) halor ka jingshah pynïap ki arngut shipara, kata, i khun kynthei ba la 4 snem ka rta bad u khun shynrang uba la 2 snem ka rta.
Ka jingkhot hajir jong kane ka Komiti ka Iingdorbar Thawaiñ ka Jylla ïa u DGP bad ïa u IO bad kynthup ruh ïa u OC ka long ban pan jingtip halor kane ka jingjia, ong ka Chairperson jong ka Committee on Women Empowerment ka Dr. Ampareen Lyngdoh.
Baroh lai ngut ki la leit mih hakhmat ka Committee ban ai jingpynshai.
Nalor kata, ka Committee ka la khot hajir ruh ïa ka Chairperson jong ka Meghalya State Commission for Protection of Child Rights ka Kong Ïamon Syiem halor kane ka jingjia.
Ïa u kpa runar u Jeofreson Jana la kem da ki Pulit ha ka janmiet jong ka 31 tarik, Jymmang, hadien ba u la wan phai sha la ïing na ka jingphet rieh hadien ba ki bahaïing bad ka Dorbar Shnong Nongrah ki la lap ïa ki ar tylli ki met ïap jong ki arngut shipara na lawbniap Wahktieh kaba don ha Nongrah.
Ïa une u runar ki Pulit ki la pynngat hapoh ki kyndon aiñ rahbor bad pynïap briew jong ka Section 364 bad 302 Indian Penal Code (IPC).
Ha ka jingtohkit une u Kpa u la phla ha ki Pulit ba u la leh ïa kane ka kam pyrshah ïa la ki jong ki khun da kaba shu siah da ka tari na u pdot.
U la phla ba u la leh ïa kane ka kam runar tang ban pynhiar kput namarba ka kurim kam kwah shuh ban dang ïashong ïasah bad u hadien ba la leit buh ïa u sha Rehabilitation Centre.
