Lyngiong, K’Lyngkot 02: Ka jingïaid kjat da ki katto katne ki riew paidbah na kylleng sawdong ba kynthup naduh Shillong, Upper Shillong ter ter ban pdiang ïa u snem thymmai kaba la sdang na Phanñiewlah Rum bad poi sha jaka ba khot ka Waiñtali la sakhi ïa ki jaka ba itynnad ha kitei ki thaiñ.
Ym tang kata, la lah ruh ban sakhi ïa ka krem ba ju sin ka krem bret briew ha jaka ba khot Dam Waiñtali kaba don ïa ka khana ba ha ki por hyndai la ju bret ïa ki riew sniew ba ju pynwit ïa ka imlang sahlang.
Ïa ka kynhun ki riew ieit mariang kiba thrang ruh ban kyntiew ia ki kam jngohkai pyrthei ha kitei ki bynta la lamkhmat da u bah Staising Kharbteng ha ka jingdon ryngkat u bah Ailand Swer uba long u Myntri ka Hima Lyngiong Lyngdohship ha ka jingdon ryngkat ki samla, ki longkmie bad riew rangbah.
Na ka liang u Bah Staising Kharbteng ha ka jingkren jong u, u la pynpaw ba kane ka jingïaid kjat ne trekking ka dei kaba la pyndep ban ïaid kjat ruh ha ki snem kiba la dep ha ka jingdon u Lyngdoh ka Lyngiong Lyngdohship bad ki riew rangbah da ka jingthmu ban pyni paidbah ïa ka jingitynnad ha kitei ki bynta.
U Bah Ailand Swer u la ong ba bun ki nongleit nongwan na ka thaiñ jong ki lehse kim tip ïa ka mariang ba itynnad ha kine ki bynta kiba don na sha lyndet ka surok kaba ki lah ban sakhi da la ki jong ki khmat lada ki poi sha kitei ki jaka.
U Bah Escommanding Marbaniang u trai shnong na Mawngap Lumparing u la ong ba ka dei ka sien ba nyngkong ba un poi sha kine ki jaka bad sakhi da la ki jong ki khmat ïa ka jinglong kyrpang kane ka jaka ha ka jingitynnad.
Katba u bah Tried Shangpliang, u bah Shaitbor Kharmih bad kiwei kiwei kiba don lang ha kane ka sngi ki la pynpaw ba kum ki trai shnong ki don ka jingthrang ba ka kam jngohkai pyrthei ha kane ka thaiñ kan kiew bad kyntu ïa ki bor sorkar ban phaikhmat ha kane ka bynta bad kyrmen ba lyngba kane ka pynpaw pyrthei ïa ka mariang ba itynnad ha ka thaiñ kan ïarap ïa kane ka jingthrang kum ki trai shnong.
