Pyllait symbai dohkha ka ophis u SF, DS Mawkyrwat bad MFA ha Phot Umnew
Haba ki doh-um ki im, ka mariang ruh ka im bad ngi ki briew ruh ngi im, bah W.L. Snaitang
Mawkyrwat, Jylliew 10: Ka Mawkyrwat Fishing Association (MFA) ryngkat bad ka Dorbar Shnong Mawkyrwat lyngba jingïasnohktilang ka ophis jong u Superintendent jong ka Fisheries (SF), South West Khasi Hills District mynta ka sngi kum shibynta ban ïa rakhe ïa ka sngi pynneh pynsah ïa ka mei mariang kaba la ju rakhe manla u snem ha ka 5 tarik u Jylliew ka la pynlong da ka prokram ban pyllait ïa ki symbai dohkha ha Phot Umnew, South West Khasi Hills District.
Kane ka jingpyllait ïa ki dohkha ka long kum shibynta ban pyn-i ba ka jingpynneh pynsah ïa ka mei mariang kam dei tang da kaba thung ïa ki dieng ki siej ha kylleng ki jaka hynrei ka dei ruh ka bynta ban pynneh pynsah ïa ki doh-um doh-wah kiba im hapoh um.
U bah O.L. Passah, Superintendent jong ka Fisheries, South West Khasi Hills District ha ka jingkren jong u, u la pynpaw ka jingaikhublei na ka bynta ka Mawkyrwat Fishing Association (MFA) kaba don ïa ka kata ka mynsiem ban pynneh pynsah ïa ka mei mariang khamtam eh ïa ki doh-um doh-wah. Namarkata, haba ong pynneh pynsah ïa ka mei mariang kam dei ba kin pyrkhat tang ïa kawei ka bynta hynrei kaba donkam ka long ban pynneh pynsah ïa ki sawdong sawkun ba ki ïohi.
Kumta u la ai ka jingkyrkhu kyrdoh ïa ka MFA bad ïa ka Shnong Mawkyrwat baroh kawei ba kin ïai don ïa ka mynsiem ban pynneh pynsah ïa kiba don sawdong bad khamtam eh lyngba ka jingpyllait ïa ki symbai dohkha kin sa ïohi biang ïa ka jingbun ki dohkha ha kane ka phot Umnew bad ban leh ïa kata ka donkam ruh la jingïatreilang na baroh ki liang.
Ha ka jingkren ba lyngkot na u Secretary Shnong Mawkyrwat, u bah W.L. Snaitang u la ïathuh ïa ka jingthmu ba kongsan jong kane ka prokram ban pynim bad pynneh pynsah ïa ki doh-um doh-wah kiba long ki jingthaw kiba im hapoh um bad haba ngi nang ban ñiewkor ka long ruh kaba kongsan ba ngin nang ban sumar. “Haba ki doh-um ki im, ka mariang ruh ka im bad ngi ki briew ruh ngi im”, ong u bah Snaitang.
Ïa ka jingkren ai khublei la ïoh na u bah W.C.D. Toi dkhot ka Shnong Mawkyrwat.
Ha kane ka sngi la ïa donlang ruh naduh u Secretary ka Mawkyrwat Fishing Association (MFA), bah S.W. Nongrum, u President ka Seng Samla Shnong Mawkyrwat, bah Kitborlang Lyngdoh Marshilong lem bad kiwei kiwei ki dkhot.