Shillong, Nohprah 23: Ka seng Hynñiewtrep National Liberation Council (HNLC) ka la ong ba ki paidbah ki dei ka hok nongkynti ha kaba ïadei bad ka krem Mawjymbuiñ bad kane kan long ruh kum ka pateng jong ki, bad ïa kane ka hok la longtrai naduh ki kulong kumah ha shwa ba kine ki shit niam Hindu kin wan ban kam trai ïa kane ka jaka.
Ka la ong ba ka Dorbar Shnong ka Mawsynram, ka la leh ïa ka kam kaba dei eh ban pynïaid ïa ki kam katkum ki riti dustur jong u Khasi, bad ka la shim ïa ka rai kaba dei rh ban pyndonkam ïa ka bor ban pynneh pynsah ïa kane ka jaka kaba long kyntang bad kaba khuid. “To ngin long kiba shai ba ki bor ba nabar kin ym lah ban pyndonkam ïa ka bor, la ka long na ki seng saiñ pyrthei ne ki kynhun niam, kim lah satia ban hukum halor kane ka jaka,” ong ka HNLC.
Ka la ong ruh ba ka jingbyrngem jong ka KSP ban khang ïa ka surok ka long thik ha ka jingmut jingpyrkhat ba kwah ban synshar donbor, ban nioñ beiñ bad ban pynduh ïa ki riti dustur jong ka jaitbynriew Khasi. “Kane ka jingïanujor ïa ka krem Mawjymbuiñ sha ka jaka lehniam kum ka Kamakhya Temple bad Tirupati Balaji ka dei ka jingpyrshang ban pynduh pyndam ïa ka riti dustur jong ka jinghiar pateng ki paid ka bri u Hynñiewtrep,” ong ka HNLC.
Ka la ong ba ka pyrshah jur ïa kano kano ka jingpyrshang ban pynlong ïa kane ka jaka jngohkai sha ka jaka kaba long kyntang ne ban leh niam. Ka krem Mawjymbuiñ kam dei satia ka Hindu shrine hynrei ka dei shi bynta jong ka bri u Hynñiewtrep.
Lada ka KSP ka nud ban pynlong ïa ka jingpakhang surok na ka bynta ban dawa ïa ka sorkar ba kan plie noh ïa ka surok ban leit sha krem Mawjymbuiñ, na ka liang ka HNLC ka la maham tyngeh da kaba ong ba baroh ki jaka mane blei ki Hindu dei ban khang khyrdep noh.
Ka la ong ruh ba kane ka jingleh jong ka KSP ka long kum ka jingpyrshang ban wanrah ïa ka jingïasngew pher niam. “Ngin long kiba shai kdar ba lada ki jaka mane blei jong ki, ki plie ngin pynthikna ba kin sa shah pynjot. Lada ki kwah ban kynshoit ngi pynphai kylla,” ong ka HNLC.
