Shillong, Jylliew 10: Ka Mawkhar Sports Club ha ka sngi Palei ka la pyllait paidbah ïa ki jersey (Home & Away) ban sa phong ha ka jingïalehkai Shillong Premier League 2021-22. Ïa kine ki jersey la pyllait paidbah da u Bah Ransom Sutnga uba dei u President ka Mawkhar SC ha ka jingïalang ha ka janmiet sngi Thohdieng ha Khasi National Dorbar Hall, Mawkhar.
Ha kane ka sngi la donlang ruh ki nongkitkam ka Mawkhar SC ba kynthup ïa u Bah Ksankupar Warjri uba dei u General Secretary, ki nongkitkam shnong, ki seng samla bad seng longkmie. La don lang ha kane ka sngi ki nong-mihkhmat ba kynthup ïa u Bah Adelbert Nongrum MLA ka North Shillong, Bah Pynshng-aiñlang N Syiem MDC ka Mawkhar Pynthorumkhrah Constituency, ki pastor, ki nongkitkam jong ki asso-ciation, ki club, ki player bad ruh ki nongkyrshan.
Ka Mawkhar SC kan sa mih madan nyngkong ha kane ka lympung ha ka 18 tarik Jylliew 2022.
Ha kane ka jingïalang ki nongkren ki la ai khublei kitbok kitrwiang ïa ka Mawkhar SC ba kan ïoh kheit ïa u soh ba thiang ban rah ïa ka nam lahduh jong ka Shillong Premier League. U Bah Adelbert Nongrum u la ai mynsiem ïa ki samla ba kin pyndonkam hok ïa ka sap ba ki don bad trei shitom khnang ba kin wanrah ka nam bad burom ïa ka club, ka shnong, ka ïing ka sem bad kumjuh ruh ïalade shimet. U la kyntu ruh ba kin kiar na ki jingmlien ba sniew kum ha ki jingdih ba pynbuaid hynrei ba kin pyndonkam hok ïa ka sap ba u Blei u la ai ha ki.
Bad kum ka jingai mynsiem u Bah Adelbert Nongrum u la pynbna ban noh synñiang 1 lak tyngka sha ka Mawkhar SC. Kumjuh ruh na ka liang u MDC Bah PN Syiem u la ai ka jingkitbok kitrwiang bad ai mynsiem ïa ki player bad kumjuh ruh ïa ka club hi baroh kawei bad pynbna ban noh synñiang da ka song pisa ba 50 hajar tyngka.
U Bah Ransom Sutnga haba ai jingkren u la ai khublei ïa ka jingdon ryngkat ki nongmihkhmat bad khamtam ïa ka dorbar shnong Mawkhar kaba long ka kti kamon kti kadiang na bynta ka club kaba la kiew shaphrang ha ka kam ïalehkai bad poi sha kane ka kyrdan ïakhun. U la ïathuh ba ïa kine ki jersey la ïarap da ka six5six kaba dei ka kompani ba la long trai da ki arngut shi para kaba la ju ïarap ruh na bynta ki jersey sha ka kynhun ïalehkai ka ri India bad kumjuh ruh ïa ka FC Goa kaba mih madan ha ka Indian Super League (ISL).
