Ha u Lber u 2025 yn sa lah ban pyndep ka jingpynheh ïa ka Shillong Airport, ong u Dy. CM

Shillong, Nohprah 22: Ka kam na ka bynta ban shim ïa ka jaka kaba donkam na ka bynta ban pynïar bad pynheh ïa ka kad liengsuiñ jong ka Shillong Airport yn lah ban pyndep hapoh u bnai Lber jong u snem ban wan.
Haba ïathuh ïa kane u Symbud Myntri Rangbah ka sorkar jylla u ba khmih ïa ka tnat ka Kit ka Bah ne Transport u Bah Sniawbhalang Dhar u la ong ba ka jaka kaba heh kumba 22 acre jong ka jingdonkam ïa ka jaka ka long kaba donkam bha na ka bynta ban pynïar ïa ka projek jong kane ka kad liengsuiñ bad ki kam ha kaba ïadei bad kane ka bynta ki la ïaid bha shakhmat khnang ban lah ban pyndep ïa kane ka kam khamkloi katba lah.
Kane ka jingong jong u ka la wan hadien ba ka Meghalaya High Court dang shen ka la pynmih ïa ka hukum kaba la bthah ïa ka sorkar jylla ba kan dei ban pyndep pura ïa ka jing aiti ïa ka jaka kaba bynrap sha ka Airport Authority of India (AAI) na ka bynta ban pynïar ïa ka Shillong Airport hapoh 3 bnai.
“Ha kajuh ka por ki la don katto katne ki pocket ne jaka ba la long trai da ki shipai bad ïa kane yn lah ban shim kam hadien ba la pynlong ïa ka jingïalang ha kane ka snem kaba thymmai,” ong u Bah Dhar.
Haba kylli na ka liang u Symbud Myntri Rangbah u la ong, “Ngin pyrshang ban pyndep ïa ka jingshim jaka kham kloi katba lah. Ngin pyrshang ban pyndep hapoh jong u bnai Lber jong u snem ban wan.”
U la pyntip ruh ba ka sorkar ka la dep ban pynlong ïa ka jingleit jurip bad la ithuh ruh ïa kiba dei ban ïoh ki jingmyntoi kiba kynthup ruh ïa ki trai jaka.
“Ngi la rai ba kan dei ka jingthied jaka kaba beit beit. Ngi la pyndep ban pynlong ïa ka jingïalang na ka liang ka tnat ki kam rep kam riang bad kumjuh ruh na ka tnat horticulture ban shim jingkheiñ ha kaba ïadei bad ka kam rem kam riang kaba dei ruh halor ka kam kaba ki la pynlut,” bynrap u Bah Dhar.
Ha ka hukum ba la pynmih ha ka 17 tarik u Nohprah ka meij kaba kynthup ïa ki nongbishar jong u Chief Justice IP Mukerji bad Justice W Diengdoh ka la ong, “Ngi don ha ka jingïohi ba ka la dei ka por ba kan dei ban don ka jingshim sienjam na ka bynta ban pynheh ïa ka runway, ki kam ha kaba ïadei bad ki jingtei bad kiwei pat ki lad ki lynti na ka bynta ban pynïar ïa ka Shillong Airport. Ngi la bthah ïa ka sorkar jylla ba kan shim ïa ki lad ki lynti ha kaba ïadei bad kane ka jingshim jaka bad ba dei ban aiti ïa kane ka jaka sha ka Airports Authority of India, kaba dei ban long hapoh ka 3 bnai naduh ka tarik ba la pynmih ïa kane ka hukum.”
“Ngi la bthah ruh ïa Director General of Civil Aviation, ha ka jingïatreilang bad ka Airports Authority of India ban pynskhem bad ban pyntreikam ïa ka rukom treikam kaba pura, ka ban long ruh na ka bynta ban pynheh ïa kane ka Airport hapoh ki 3 bnai naduh ba la ïoh ïa ka jaka bad kumjuh ruh ka jingaiti ïa ka jaka sha ka Airports Authority of India da ka sorkar jylla. Ïa kane ka PIL la buh ban bishar biang haduh ka 14 tarik jong u bnai Ïaïong, 2025 ban pyrkhat ïa ka jingshimkam da kiba dei ban jubab. Ka long kaba donkam ba ïa ki kam ba la shim dei ban aiti da ka Airports Authority of India bad ka sorkar jylla,” ka la bynrap.
Ïa kane ka PIL la ujor ha kaba ïadei bad ki kam pynroi bad kumjuh ruh ha kaba ïadei bad ka jingpynheh ïa ka Shillong Airport.
Ka meij ki nongbishar ki la ïohi bad khmih ruh da kaba ong, “Ban long kiba shai, ki kam kiba donkti ha kaba ïadei bad ka jingpynheh ïa ka runway bad kiwei pat ki kam jingtei hapoh bad sawdong jong ka bad kumjuh ruh kiwei pat ki lad hapoh ka airport la donkam ban shim khia. Ha ka jingïohi jong ngi, kane ka kam ban kyntiew ïa ka Shillong Airport ka dei kawei na ki kam ba la shim khia da ka jylla ha kaba ïadei bad ki kam kiba don kam bad kiba long ruh ha baroh ki liang. Kane kan pynsuk ruh ïa ki rukom treikam bad kumjuh ruh ka jingwan hiar jong ki liengsuiñ kiba heh bad kumjuh ruh kiba kit ïa ki nongleit nongwan. Kane kan kyntiew ruh ïa ka ïoh ka kot bad ka jingkiew ki kam jngohkai ha kane ka jylla.”