Shillong, Nohprah 22 : U Superintendent of Police ka Fire & Emergency Services Western Range (Garo Hills) u Bruno A Sangma ha ryngkat ka kurim bad arngut ki Khun, kila mynsaw na ka jingkylla ka kali kaba ki ïashong.
Kane ka jingjia kala jia ha ka por janmiet sngi U Blei por 3 baje eiei, ha ka surok National Highway 207, hapdeng ka Tura bad Rari, ha ka shnong Snalgre, North Garo Hills.
Une u Heh Pulit u ñiah hi ïa ka kali bad ka kurim ka ïashong lang bad u hakhmat katba ki arngut ki khun ki don shadien ha ka por ba jia kane ka jingjia.
Kane ka Longïing ka dang thmu ban leit sha Kharkutta ban ïaleit leh Khristmas hala ka jong ka ïing. ïa kine ki shi-ïing shisem la pynkit noh sha Bajengdoba Health Centre ban ïoh ai jingsumar bad hadien la pynkynriah sha Apollo Hospital, Guwahati ban ïoh ïa ka jingsumar ba kham paka.
