Shwa ka lympungbah ha Umsning, la pyllait ïa ka jingrwai jong ka Claret Way Youth Meet 2025

Shillong, Nohprah, 22: Hadien ba ladep ban pynbit pynbiang nadong shadong la pyllait paidbah ïa ka ka jingrwai ba la ap khmih lynti bha na ka bynta ka lympungbah jong ki samla kaba la tip kum ka Claret Way Youth Meet 2025.
Halor ka phang “Pilgrims of Hope: Go Forth and Serve” kum ka jingpynkhreh na ka bynta ka World Youth Day Pilgrimage ka ban sa long ha nongbah Rome ha u snem 2025, ka jingrwai ka kynthup ïa ka jingmut jong ka lympungbah ka ban sa long ha kaba 250 ngut ki nongïashim bynta samla na ka thaiñ Shatei Lammihngi jong ka ri India kin sa ïashim bynta.
Ia ka music video la pyllait paidbah da u Provincial Superior jong ka thaiñ Shatei Lammihngi u Rev. Fr. Joseph Mapillaparambil ryngkat ka jingsakhi lang jong ki Lyngdoh Sohblei bad ki samla.
Kumba la buh sngi ban pynlong naduh ka 3 tarik haduh ka 6 tarik Kyllalyngkot, 2025 ha St. Claret Seminary, Umsning halor ka phang “Pilgrims of Hope: Go Forth and Serve” kane ka lympungbah kan pynleit jingmut ha kaba pynroi ïa ka mynsiem jong u symbai jingngeit, ka jingshakri bad ka imlang sahlang hapdeng ki samla, ki kam ba thymmai bad ka jingpynriewspah ba kynja mynsiem ha kaba ki nongïashim bynta kin ïohlad ban sdang ïa ka jingïaid lynti jong ka jingkyrmen bad ka mishon ha la ka jong ka jingim.
Haba kren ha kane ka sngi u Rev. Fr. Joseph u la ong, “kane ka jingrwai phang kam dei tang ka jingrwai hynrei ka sur jingkhot ïa kawei pa kawei ka dohnud jong ki samla ban ïohi ïa ka jingkyrmen bad ban aiti ïalade ha ka jingshakri. Katba ngi dang pynkhreh ïa ka lympungbah ka ban sa pynkylla thymmai, ai ba kane ka jingrwai kan long ka lad ai mynsiem ïa baroh kiba ïadon bynta bad ngi.”
Ka Claret Way Youth Meet ka la pynroi ïa ka jingïatylli, ka jingim ba kynja mynsiem bad ka jinglong nongïalam hapdeng ki samla.
Ka Organizing Committee ka khot bad wer ïa baroh ki nongkyrshan ban ïasnohkti lang ban pynlong ïa kane ka lympungbah kaba jop.