Shillong, Jylliew 08 : Ka Myntri jong ka tnad Women and Child Development, ka Smriti Irani ka la ong ba ka long kaba donkam bha na bynta kito kiba don ha ka bor synshar ba ki buh hakhmat eh ïa ki ishu kiba ïadei bad ki kynthei bad ruh ki khunlung khynnah ha ka jingtreikam jong ki.
Ïa kane ka Myntri ka la kren ha ka video conferencing ha ka lympung kynduh lang kaba nyngkong eh jong ki longkmie ka jylla ïa kaba la tip kum ka State Women’s Conference kaba long ha State Convention Centre, Shillong. Ha kajuh ka por, ka Myntri ka la pynpaw ruh ïa ka jingkmen ba ka sorkar ka la pynlong ïa kum kitei ki lympung na ka bynta ban ïakren ïa ki ishu kiba ktah ïa ki khunlung bad khynnah.
“Nga kyrmen ba kane ka sienjam ba ka Meghalaya ka shim kan long ka nuksa na ka bynta kiwei pat ki jylla kumjuh ruh ïa ka sorkar India ban pyrthuh lang,” ong ka MLA na Amethi, Uttar Pradesh haba ïaroh artad ïa katei ka jingpynlong jong ka Meghalaya ïa katei ka lympung.
Ha shwa kane, u Myntri Rangbah hadien ba u la plie ïa katei ka lympung kaba la pynlong halor ka phang, “Support and Celebrate”, u la ong ba katei ka jingkynduh kadei kaba heh tam ha ka jylla hadien bun bun snem. Katkum ka jingïathuh jong u, ki la don haduh kumba 2lak ngut ki longkmie kiba shim bynta ha katei ka lympung na ki 46 tylli ki block da kaba shu peit online.
Ha kane ka sngi, u Myntri Rangbah u la pyllait paidbah ruh ïa ka Early Childhood Development Mission bad pynbna ruh ba la pyllait ïa ka rynsan pan jingïarap ba la tip kum ka 181 Helpline.
