Shillong, Nohprah 15 : Ka jingweng noh jong ka Congress ban kyrshan ïa ka Executive Committee ba ïalam da ka NPP ha KHADC ka la poi haduh u pud ba u CEM ka KHADC, Bah Pynïaid Sing Syiem ba un hap ban tuklar lang ïa ki tnad ba bat da u Deputy CEM Bah Pynshngaiñ N Syiem kumjuh ruh ïa ki tnad ba bat da u Executive Member, Bah Victor Ranee, ha kane ka Dorbar Tlang kaban sdang naduh ka 19tarik mynta u bnai.
Lah ban kdew hangne ba u Bah Pynshngaiñ kum u Deputy CEM u bat ïa ka tnad Elaka bad kumjuh ia ka tnad Law jong ka Council, katba u Bah Victor pat u bat ïa ka tnad Arts and Culture bad kiwei kiwei.
Da ka jingmih noh jong ki lai ngut ki MDC Congress na ka Liang Synshar, ba kynthup lang ïa u Bah Ronnie V Lyngdoh ba dei MLA/MDC ka Mylliem, ka Liang Pyrshah mynta ka la nang khlaiñ namar ka la kynjoh sha ka 9 ngut ki dkhot.
Na ka liang u Bah Pynshngaiñ haba kren bad ki lad pathai khubor hadien ba la pynbna ba la dep ban weng noh ïa ka jingïatrei lang ha ka Executive Committee, u la ong, “Wat lada ka Congress kan shong noh hapoh ka liang pyrshah hynrei ka long kaba kloi ban leh ïa la ka jong ka bynta hapoh ka Ïingdorbar.”
Katkum ka jingong jong u, ki MDC jong ka party kin pyndep ïa ka kamram kum ka Liang Pyrshah bad ki long kiba kloi ban pyrshah lada kim trei bha.
Shuh shuh u la ong, “Ka rai jong ngi ban weng ïa ka jingkyrshan kan ym ktah ïa ka EC naba ki dei kiba dang bun paid hapoh ïingdorbar namar ki dang don kumba 16 ne 17 ngut ki dkhot hapoh ka KHDF.”
