Da ki jaiñ syaid ai u Bah Pyndap Shadap sha ki longïing bad ba thut dkhot met ha Borato

Khliehriat, Nohprah 14 : U samla rangbah uba na ka shnong Khliehriat, East Jaiñtia Hills District, u bah Pyndap Shadap ha ryngkat ka jingïatreilang bad ka kong Christine Sten kaba na ka shnong Borato, hynnin ka sngi u la noh jingiarap da ki jaiñ kup thiah kiba syiad sha kiba bun ki longïing ba duk bad sha kito ki briew kiba don jingthut ha ki dkhot met ha shnong Borato, West Jaiñtia Hills District.
Ki la don haduh hynriew phew tylli ki longïing kiba na ka shnong Borato kiba la ïoh pdiang ïa ki jaiñ kup thiah ba syiad bad da ka jingkmen ki la ai ka jingkhublei sngewnguh ïa u bah Pyndap Shadap, ki la ai ruh ki kyntien kyrkhu kyrdoh lem bad ka jingkhublei kitbok kitriwang ba un nang lah ban leh shuh shuh ki kam leh isynei ïa kiba duk kiba donkam ïa ki jingiarap.
Haba kren ha ka jingialang ba lyngkot ha shnong Borato, u bah Pyndap Shadap, u la ong ba um lah ban noh jingiarap sha baroh ki nongshong shnong hynrei u la iarap katba lah la ka bor, u la bynrap ruh da kaba ong ba “ha kano kano ka bynta lada nga ïohlad ban iarap nga sngew kmen ka mynsiem, namar haba u Blei u la kyrkhu ïa nga kumta katba nga lah ngan iarap lem ïa kiwei ruh”
Ka kong Christine Sten ka la ong, “kane ka dei ka jingsdang jong nga ïa kane ka kam leh isynei kumba la lam lynti ïa nga da u bah Pyndap Shadap kum u paralok uba ngi ju ïa treikam lang” ka la ai ruh ka jingkhublei ïa u bah Pyndap uba ju lam lynti ïa ka man ka por ha kiba bun ki kam bad ong ruh ba u bah Pyndap u dei u briew uba ju don ka mynsiem sngewlem bad u ju kren bad khana ruh shaphang kiba duk ba shem jingeh bad u ju pyrkhat ruh kumno ban biang ka kam ka jam ka kamai ka kajih ban ïoh ka lad ban iarap lem ïa kiba duk.
Ka la ong ruh ba u dei u briew uba la leh bun ki kam leh isynei bad theh jingiarap ym dei tang ha shnong Boarato hynrei sha kiwei kiwei ki shnong ruh u la theh ki jingiarap khamtam sha kito ki shnong kiba don ha ki thaiñ ba khappud bad ka Assam.
“Nga kyrpad ba phin sngewbha ban buh lem ïa ngi ha ki jingdwai ba ngin ïoh ka met kaba koit ba khiah ba ngin dup ïoh ïa ki kamai kajih ba bit ba biang ban dup ïoh lad shuh shuh ban theh ki jingiarap” ong ka kong Christine Sten ia ki paidbah bad bynrap ruh ba ka kmie jong ka bunsiem ka ju kren bad pynsngew bad hikai ruh ba dei ban don ka mynsiem ban iarap lem ïa kiwei kiba duk ba kyrduh.
U bah Joptimon Pala, na ka shnong Sakhaiñ, uba la ïa don lang ha katei ka sngi bad haba kren sha ki nongshong shnong u la ong bad pynsngew ba u bah Pyndap Shadap u dei u samla uba don ka mynsiem sngewlem ban iarap ïa kiba duk ba kyrduh,u la ai jingiaroh ruh ïa ka jingdon mynismem u bah Pyndap uba ju noh jingiarap ym tang ha ka shnong Boarato hynrei wat sha kiwei kiwei ki shnong ruh.
Na ka liang ki rangbah dong jong ka shnong Borato kiba la ïa don ryngkat ha katei ka sngi, ki la ai ka jingkhublei sngewnguh ïa u bah Pyndap Shadap, uba don ka mynsiem sngewlem bad uba la wan ban noh jingiarap ïa kiba duk bad ïa ki nongshnong shnong kiba don jingduna ha ki dkhot met da ki jaiñ kup thiah ba syiad, ki la ai ruh ki jingkitbok kitrwiang ba un nang lah ban kiew ha ki kam ki jingtrei jong u ba un nang lah ruh ban theh jingiarap shuh shuh sha kiba donkam ka jingiarap.
Kiba la ïa don ryngkat lang ha katei ka sngi ba sam jaiñ syiad ha shnong Boarato, ki kynthup ruh u bah Ïaishah Sutnga u ba na shnong Sakhaiñ, ka kong Nica Lapasam ba na shnong Khliehriat, u bah Brightstar Shadap, u Rangbah dong Barato –A, u bah Shiniwanhi Situng, Rangbah dong Barato C, u bah Arnes Dkhar bad u Rangbah dong Kyriat.