Mairang, Jylliew 7: Ka jingrakhe ïa ka Taiew Pynneh Mariang ïa kaba la pynlong da ka ophis u Deputy Commissioner ka Eastern West Khasi Hills District, ha ryngkat ka jingïatreilang bad ka Basin Development Unit West Khasi Hills District, Nongstoiñ, kaba la sdang naduh ka 31 tarik u Jymmang, ka la kut noh mynta ka sngi ha ka prokram kaba la pynlong ha Tirot Sing Memorial Hall Pyndengumiong Mairang, ha kaba u Syiem ka Hima Nongkhlaw, u Pa’iem P.M Syiemlieh, u la long u kongsan ha ka jingdon ryngkat u Deputy Commissioner ka Eastern West Khasi Hills District, u Bah W.Nongsiej, u BDO ka Mairang Block, u Bah C.P Mawkon, ki nongtrei jong ki tnat sorkar bapher bapher hapoh ka Distrik, ki nongïalam shnong, ki nonghikai bad ki khynnah pule.
Haba kren kum u kongsan ha kane ka sngi, u Syiem ka Hima Nongkhlaw u Pa’iem P.M Syiemlieh, u la khot la wer ïa baroh kiba la ïadon lang ha kane ka prokram, ba kin shim halade ïa ka jingkitkhlieh ban ïada bad ban pynneh pynsah ïa ka mariang, namar u bynriew u don tang kawei ka pyrthei ba un shong un sah.
U Deputy Commissioner ka Eastern West khasi Hills District ha ka jingkren jong u, u la kren shaphang kiba bun ki bynta kiba ïadei bad ka mariang, kiba kynthup ïa ki jait jingpynjulor ïa ka na ki daw kiba bun, kiba kynthup ïa ka jingroi stet u paid bynriew ha sla pyrthei bad ka jingdon jong ki karkhana ba bun jait.
U la ban ruh halor ka jingshisha ba ka kam pynneh mariang, kam dei ka kam kaba shi sngi.
Ha kane ka prokram la ïoh ruh ban sam ïa ki khusnam sha ki khynnah skul hapoh ka Distrik kiba la jop ha ka jingïakob bapher bapher bad la sam ïa ki khusnam Best Village Natural Resources Management Committee (VNRMC) sha ka VNRMC jong ka shnong Lyngdoh Maram, kaba hap hapoh Mairang Block bad ka VNRMC ka shnong Nongshillong, kaba hap hapoh Mawthadraishan Block.
