Kynshi, Jylliew 7: Ïa ka prokram 12 sngi ba nyngkong jong ka ‘Aapda Mitra Training’ jong ki Volunteer shnong, la sdang pynlong ha ka sngi ba ar jong ka taiew ha Kynshi Bangla Community Hall Kynshi, ha kaba la pynïaid da ka DDMA West Khasi Hills bad la wan ban ïa shim bynta da ki community volunteers, u SDO Water Resource bah R.Nongphud, AFPO Fire & Emergency Meghalaya Shillong bah M Rymbai, bah W Nonglang Deputy Controller, Civil Defense & Home Guard Nongstoiñ bad bah A Syiemlieh Sordar Kynshi Bangla
U bah J Mawthoh DDMO, DDMA West Khasi Hills haba ai jingkren, u la batai ïa ‘Aapda Mitra Scheme’ jong ka ‘National Disaster Management Authority’, kaba la pyntreikam ha ki District ka ban ai jinghikai ïa ki100 ngut ki volunteers ban pyllait im, ban ai jingïarap bad ban ïa trei lang lada wan lynshop ki bor mariang.
U la ïathuh ba ki volunteer kiba la ïoh ïa kane ka training, yn sa ai ïa ki tiar ïada kum ki ‘personal protective equipment bad emergency response kits’, ha kaba yn pynïaid da ka District Disaster Management Authority (DDMA), ban ai jingïarap lada don kino kino ki jingjia lynshop.
U la ai khublei ïa ka jingïa shim bynta shitrhem jong ki volunteers bad kyntu ruh ban long kiba la kloi bad khreh ban ai jingïada ïa ki jingim briew, haba wan jia kino kino ki jingjia ha ki shnong ki thaw, da kaba hikai ruh ïa ki para nongshong shnong lyngba kane ka training.
Kiwei kiba la ai jingkren ki long u bah W Nonglang, Deputy Controller, Civil Defense & Home Guard Nongstoiñ, bah A Syiemlieh Sordar Kynshi Bangla bad ki resource persons ki kynthup ïa ki stad ki jhad na Civil Defense & Home Guards, Shillong, bah P Marbaniang na MATI, Shillong, State Search and rescue team, Fire & Emergency Services, Shillong bad ki Medical Team na Tirot Singh Memorial Hospital, Mairang.
