Ba saphriang ka video ba sumar ïa i heprit, panmap ka MS Civil Hospital Mawkyrwat

Mawkyrwat, Nohprah 05: Hadien ka jingsaphriang jong kawei ka dur khih ha ki rynsan social media jong iwei i heprit kynthei iba dang 5 snem ka karta iba la shah sumar da kaba sei ïa ki ksaiñ na ka ngab jong i kaba la sdang kem pyut, kumta naka liang ka Dr. M. Lyngdoh, Medical Superintendent (MS) jong ka Civil Hospital Mawkyrwat mynta ka sngi ka 5 tarik u ‘Nohprah, 2024 haba ïa kren bad ki lad pathai khubor ka la pynshai paidbah halor katei ka jingjia.
Namarkata, katkum ka jingïathuh ka Dr. Lyngdoh ka la ong ba ïa itei i heprit la wan ban pynkit da ki kmie ki kpa ha Civil Hospital Mawkyrwat ha ka 2 tarik u ‘Nohprah, 2024 bad hadien shisngi ba ki la sumar ïa i ha ka sngi kaba bud ka 3 tarik ki la phah noh ïa i sha Lawmali Hospital, Shillong namar ba ka jingmong ha ka ngab ka la jur.
Ha kaba ïadei bad ka jingring ïa ka dur khih, ka Dr. M. Lyngdoh, Medical Superintendent (MS) jong ka Civil Hospital Mawkyrwat ka la ïathuh ba ïa ka video la ring hi da ki para nongtrei jong ka ka Civil Hospital ha ka por ba ki dang sumar ïa itei i heprit. “Ka jingring ïa ka dur khih ka long kum shibynta ban buh ïa ka record hapoh ka jaka sumar”, ïathuh ka Dr. M. Lyngdoh
Ym tang kata, ha kaba ïadei pat bad ka jingsaphriang jong katei ka dur khih, ka Dr M. Lyngdoh ka la ïathuh ba ka dei ha ka por ba ki ïa phah para nongtrei bad lehse ka jingpur katei ka dur khih ka lah ban dei nangta. Kumta, na ka liang ka Dr. M. Lyngdoh, Medical Superintendent (MS) jong ka Civil Hospital Mawkyrwat ka la pan map ruh na ki kmie ki kpa bad kiba ha-ïing ha-sem jong itei i heprit namar ka long kum shibynta ka jingpynkheiñ ïa ka hok jong ki nongpang.
Lah ban kdew ba ïa i heprit ba dang 5 snem karta i dei na ka shnong Mawbidong, South West Khasi Hills District bad idei i khun jong ka kong Royalpantila Khyllem Kharai bad u Bah Overjoy Jyrwa bad mynta ïa i la phah ban leit sumar noh ha Lawmali Hospital, Shillong, East Khasi Hills District.