Pynsngew ka SSSS ha ka DC South West Khasi Hills ba duna ki skul pule bad surok ha Warsanlyngdoh

By Mawphor Editor On Jun 9, 2022

Mawkyrwat, Jylliew 08: Ka Synjuk ki Seng Samla Shnong jong ka Warsanlyngdoh Area ha ka jingsynranlang jong ki para dkhot lem bad u Sordar Shnong Pyndeng-Umjarain, South West Khasi Hills District, mynta ka sngi ha ryngkat ka jngthoh (dorkhas) ki la leit ban ïa kynduh ïa ka Deputy Commissioner jong ka South West Khasi Hills District ban paw ne ïathuh ïa ki jingeh ba ki paidbah ka thaiñ Warsanlyngdoh baroh kawei ki mat bad ki ïa kynduh ha kine ki sngi.
Ki jingeh ba kane ka dong ka thaiñ Warsan-lyngdoh ki ïa kynduh ki long ha ka liang ki surok namar da ka jingbymdon jong ki surok kiba biang ka shem jingeh ïa ki ha ka ïaid ka ïeng lyngba ki kali namar hooid ki don ki shnong kiba la don ki surok hynrei ym don pat ki surok kiba bha ne ki surok ba la siang rong bad kumjuh ruh da ka jingbym don ki jaka pule ruh ka long kawei na ki daw jong ka jingpep skul shiteng por jong ki khynnah namar ha kane ka thaiñ ym don secondary school bad lada ki khynnah skul ki kwah ban bteng ïa ki jingpule ki la hap leit sha kiwei pat ki jaka bad kane ka buh jingeh shikatdei na ka bynta ki longïing ki bym kot bor.
U bah Zandy Myrthong, President jong ka Synjuk ki Seng Samla Shnong Warsanlyngdoh Area haba kren ha ki lad pathai khubor u la pynsngew ba hadien ka jingïatai bad ïa kren bad ka Deputy Commissioner jong ka distrik, kong C. Kharkongngor, IAS ha kaba ki la don ka jingkyrmen namar ma ka ruh haba ïa kren ha kaba ïa dei bad ki surok ka khot lang ruh ïa u Assistant Executive Engineer jong ka PWD (R) Mawsaw Division khnang ba kan long ka jingïakren kaba beit bad kaba ryntih.
Kumta, ha ka dorkhas ba ki la phah ha ka Deputy Commissioner, South West Khasi Hills District ki la pynpaw ba ha kaba ïa dei bad ki surok kum ka synjuk ka la buh jingkyrpad ba namar ka jingbym lah ban pyndep u nongpyntrei ban siang rong ïa ka surok PMGSY na Pyndeng-umjarain haduh Mawphan-rang kaba don kumba 5 kilometer bad ïa kane ka surok ka dei kaba la dep ban sdang naduh u snem 2019 hynrei haduh mynta u nongpyntrei u khlem trei shuh bad u la shu trei tang khyndiat kaba long tang kumba 200 miter ei ei ka jingsiang rong bad siang maw malu la kumba 3 kilometer ha kaba ka la don ka jingdkoh ha ka ïaid ka ïeng jong ki paidbah.
Ha kajuh ka por u la pynsngew ruh ban pynïoh surok na Nongrynñiang sha Nongtnger kaba jngai kumba 7 kilometer ei ei khnang ban pynsuk ïa ki paidbah ka dong ka thaiñ ha kiba bun ki liang, namar lada don ka surok kan pynsuk ïa ka ïaid ka ïeng bad ban ïoh ban pyndep ïa ki kam kiba bun la ka long ki kam ba ïa dei bad ki ïing ki sem, bad kiwei kiwei de bad kumba long mynta lada leit donkam sha Nongtnger la hap ban kiew shwa na Wahkaji kaba shim por haduh 30 kilometer ei ei ban poi sha Nongtnger. Namarkata, u la buh ka jingkyrpad ba lada don ka surok kan ai jingmyntoi ruh ha ka liang ka ïoh ka kot jong ki paidbah ba bun balang namar kumba ka long haduh 80% hi ki paidbah nongrep na Warsanlyngdoh ki leit ban rep sha Kohtyllaw.
Shuh shuh na ka liang u bah Zandy Myrthong u la ïathuh ruh kum ka Synjuk ka la kyrpad ruh ban pynïoh surok na Mawjai sha Nongummer kaba don ïa ka jingjngai kumba 6 kilometer ei ei ha kaba u la ong ba ki kwah ban tip kumno kane ka kam ka la ïaid mynta, hynrei katkum ka jingïathuh u AEE ka PWD (R) la ong ba ïa kane ka kam la jan sa ban pyndep bad kaba dang sah ka long sa tang khyndiat ban leh ïa ka Details Project Report (DPR) bad kyrmen ba mynta u snem hi ynsa lah ban khot nongpyntrei noh ne khot tender.
Namarkata, halor kine ki jingpynsngew jong ka Synjuk Seng Samla Warsanlyngdoh Area na ka liang ka Deputy Commissioner jong ka distrik bad kumjuh ruh u Assistant Executive Engineer jong ka PWD (R) Mawsaw Division ki la kular ban shimkhia ba ha kaba ïa dei bad kine ki jingpynsngew kin sa rah ha ki bor ba hajrong khnang ba kan nym don kano kano ka jingeh ha kaba ïa dei bad ka jingpyntyllun ïa ka kam.
Ha kaba ïa dei bad ka jingnang jingstad lyngba ki jaka pule, u bah Zandy Myrthong u la buh ka jingkyrpad ba dei ban pynkiew kyrdan ne upgrade noh ïa ka Nongtynñiaw Upper Primary School sha ka Secondary School namar ha kane ka thaiñ haduh mynta ym pat don Secondary School hynrei lada ki khynnah skul ki kwah ban bteng ïa ki jingpule ki la hap ban kiew sha Mawkyrwat ne hiar haduh Nongstoiñ bad kane ka wanrah bad buh shibun ki jingeh ha kaba lada dei ki longïing ki bym kot bor bun ki khynnah pule ki la hap ban ieh noh noh ïa ki jingpule bad kane ka pynhiar dor bad pynduna ïa ki briew kiba nang kiba stad ne don ha ki kyrdan kiba kham halor namar tang na ka daw jong jingbymlah ban phah bteng ha kiwei pat ki jaka ne jingbymdon ki jaka pule kiba biang.