Shillong, Nohprah 03: U nongïalam ka NPP bad u Myntri ka sorkar jylla u Rakkam A Sangma ha ka sngi Nyngkong u la ong ba ki nongïalam jong ki saiñ pyrthei kiba la paw bha kim ju leit phai biang sha ka seng kaba rim hynrei ki pyrshang ban tei ïa la ka jong ka ïing ka sem kaba thymmai.
Haba kren sha ki lad pathai khubor u Rakkam u la ong ba u nongïalam u ba la rai ban ïeng ha la ka jong um shim ruh ïa ka rai ïa ka pateng ban wan ha ka jingim jong u shimet.
“Captain Williamson Sangma um ju leit phai biang sha ka APHLC, u Purno A Sangma u khlem leit phai biang sha ka seng Congress. Kine ki nongïalam ki la tei ïa la ki jong ki ïing ki sem kiba thymmai,” u la ong.
Haba kylli shaphang u Myntri Rangbah barim ka jylla u Dr Mukul Sangma, uba la iehnoh ïa ka Congress bad pynïasoh ïalade sha ka All India Trinamool Congress (AITC), u Rakkam u la ong, “U la don ïa la ka jong ka ïing. U Mukul u la dei u nongïalam ka TMC. U la ïakhun bha hapoh Gambegre. Ki la poi ha ka kyrdan kaba ar bad ki la buh ïa ka seng Congress ha ka kyrdan kaba lai, kumta ka jingdon jong u ka long kaba kongsan bha hynrei ka shong ha u ban rai. Ngam long eiei ban kren shaphang u Mukul. U la long u nongïalam ba la rim bha bad ngam tip ïa ka daw balei u la iehnoh ïa ka seng Congress.”
Une u nongïalam ka NPP u la ai jingmut ba ka seng Congress kadei ban pynkhuid shwa ïalade lada ka kwah ba u Mukul un wan phai biang sha ka seng.
“Ngam tip la ka la don shisha ne em ka jingpynkhuid. Lada phi peit ïa ka khana pateng bad ka nongrim jong ka jylla jong ngi, la saiñdur bad pynkhreh ïa u Mukul Sangma da u PA Sangma, ki la donlang hajuh hynrei kane ka kam ka la jia,” u la ong.
Shuh shuh u Rakkam u la pynkynmaw ba ka jingjop jong ka NPP ha elekshon shiteng samoi ha Gambegre ka dei ka jingïathuh ba ka MP election ka dei ka khana kaba ïapher naba ha kane ka constituency ka dei ka jaka jong ka Congress khamtam kaba la pynjop ïa u MP na Tura u Saleng A Sangma hynrei mynta ba u la iehnoh ïa ka party kumta kam shym la ïoh shuh ïa ka jingjop.”
“Kane ka kren jam ba kumno ka NPP hapoh ka jingialam jong u Conrad K Sangma, ngi kyrmen ba ka Meghalaya kan kiew,” u la bynrap.
Haba kylli halor ka jingpynïasoh jong ki katto katne ki nongïalam ka NPP sha ka seng Congress, u Rakkam u la ong, “Ka jingmih ha ka kam saiñ hima sima kam long kumba phi la ïathuh lypa. Ka NPP ka la jop ïa ka Gambegre seat da kaba ïoh bun bad katto katne ki nongïalam seng saiñ pyrthei bad ki nongïalam ka VPP, NPP ki la pynïasoh sha ka Congress, kane ka dei ka jingkylla ha ka saiñ pyrthei, bad ngim lah ban ïathuh lypa kaei ka ban jia mynta ka sngi bad kaei ka ban jia la shai ka sngi.”
Hynrei lada kumba 500 ngut ki la pynïasoh bad ka Congress, ha Gambegre palat 8,000 ngut ki briew ki la pynïasoh sha ka NPP. “Peit ïa ka jingïapher. Kane kam dei ka kam kaba thymmai ha ka politic. Ka jingpynïasoh kan jia na ka daw jong ka elekshon MDC ka ban sa long shen,” u la ong.
