Khliehriat, Naiwieng 28: U President rangbah jong ka Jaiñtia Students Movement, u bah Leningstar Rymbai, mynta ka sngi u la pyllait paidbah ïa ka kali kit nongpang jong ka seng ban ai ka jingshakri ïa baroh ki paidbah jong ka ri lum Jaiñtia, khamtam kito kiba na ki longïing ba duk, ba duna ka ïoh ka kot, ha kane ka sngi ka seng ka la pynlong ruh ïa ka prokram ai snam ei bad la pynlong ïa ka prokram ha shnong Mookhep, East Jaiñtia Hills District.
Haba kren kum u kongsan bad kum u nongïalam, u bah Leningstar Rymbai, u la kyntu, u la ai mynsiem bad pynshlur ïa ki dkhot jong ka Jaiñtia Students Movement ba ki dei ban long kiba la kloi ban kit ïa ka lyngkor ban shakri ïa ka imlang ka sahlang ha baroh ki liang bad ong ruh ba da kane ka jingioh ban pyllait paidbah ïa kane ka kali kit nongpang ka seng kan sa nang lah shuh shuh ban kner ïa ki kti ban ïarap ïa kito kiba hap ha ka pang ka shitom khamtam kito kiba na ki longïing kiba dang duna ha ka ioh ka kot ban iarap ban pynpoi ïa ki sha ki jaka ai jing sumar ne sha ki Hospital, ha kajuh ka por u kyntu ruh ïa kito kiba dei ban peit ïa kane ka kali kit nongpang ba ki dei ban da sumar bha ïa ka kali bad ba kim dei ban pyndonkam bakla ïa kane ka kali kit nongpang ne ka Ambulance.
Ha kaba iadei pat bad ka prokram ai snam ei, u General Secretary ka AI JINGIM, VBDO SHILLONG, u bah Andreas Marweiñ, u la kren bad pynshai halor ka jingdonkam ban nohsyniang ne ban ai snam ei kaba long shi bynta ka jingnoh syniang kaba khraw ïa ka imlang ka sah lang, u la pynshlur ruh ïa ki nongïalam bad ki dkhot jong ka JSM ba ki dei ban mih shakhmat ban long ki ba la kloi ban ai sngewbha ïa ka snam jong ki khlem ka jingtieng ne jing artatien namar da ka ba ai snam kan iarap ïa ki ban ioh ïa ka met ka phad ka ba koit ba khiah. Da ka snam jong kito kiba noh syniang ka lah ruh ban pyllait im ïa ki mynsiem ba kordor kiba pang ba shitom kiba donkam ïa ka snam.
U Adviser ka Ephatha Society Moowakhu EJHD, u bah Emlangki Supuh ruh u la kren halor kane ka phang ba iadei bad ka jingdonkam ban noh syniang da ka snam ka ba lah ban long ka jingkyrkhu ïa ka imlang ka sahlang khamtam kito kiba donkam kyrkieh ïa ka snam ha ka por ba pang ba shitom.
Ha kane ka prokram ba kyrpang jong ka JSM la ioh ruh ka jingkren na u Waheh Shnong Mookhep, u bah Denis Siangshai, u General Secretary JSM Central Body, u bah Roitre Dkhar , u President JSM Western Region, u Heihokmi Supuh, ki riew rangbah kiba la ïa don ryngkat lang ha kane ka sngi ki kynthup u Waheh Shnong Pamra Kmai, u bah Ïaikiewbha Rymbai, u Secretary Shnong Mookhep, u bah Francis Dkhar, u Chairman Shnong Mookhep, u bah Arkycious Dhar bad ki Nongkitkam, nongïalam bad ki dkhot jong ka seng kiba la wan na ki thaiñ bapher bapher na ki Circle bad ki Unit.
Ïa ka prokram la pynïaid da u Asst. Secretary JSM Central Body, u bah Kerbhame Dkhar bad la iohbïa ka jingkren na u President JSM Eastern Region, u bah Wellson RD Siangshai, uba la ai ka jingkren pdiang burom ïa baroh, kiba la ai jingkren ki kynthup ruh u General Secretary JSM Western Region, u bah Shanskem Suchiang, u bah Francis Dkhar, u General Secretary JSM Western Region, u bah Shanskem Suchiang, u bah Francis Dkhar bad kiwei kiwei.
La pynitynnad ïa ka prokram da ka jingshad pdiang burom na ki Samla kiba na ka shnong Mookhep.
Na ka liang ka seng Jaiñtia Students Movement ka buh ka jingpynbna bad lada don kino kino ki nongshong shnong, khamtam kiba na ri lum Jaiñtia ba lada ki donkam ïa ka kali kit nongpang ne ka Ambulance, ki lah ban phone ha u Number: 8787789140 / 93831 88128.
