Ki paiñkhana ki ïada na ka jingsaphriang ki khniang jingpang: EE PHE

Mawkyrwat, ‘Naiwieng, 20: Ka ophis u Executive Engineer, PHE Mawkyrwat Division-cum-Member Secretary jong ka District Swachh Bharat Mission Grameen, South West Khasi Hills District ha ka sngi Baar ka la rakhe ïa ka “World Toilet Day 2024” kum shi bynta b an pynsngewthuh paidbah kumno ban pynneh pynsah ïa ka jingkhuid jingsuba jong ki paiñkhana, kumno ban sumar bad ban lehkhuid ïa ki khnang ba ki briew ki lait na ka jingkharoi jong ki khñiang jingpang ba bun jait.
Ha kane ka sngi la plie ruh ïa ka campaign kaba ïadei bad ki kam ki ban sa pyndep ha kane ka jingrakhe ïa ka “World Toilet Day 2024” ban sa pynkut haduh ka 10 tarik, Nohprah, 2024.
U Executive Engineer jong ka PHE Mawkyrwat Division Bah K. Nongbsaw haba kren kum u kongsan ha ka jingïalang u la pynkynmaw ruh ba ka United Nation Organsation (UNO) ka la pdiang ïa ka jingïakren ha u snem 2013 ba kan don ka jingrakhe kyrpang ïa ki paiñkhana ne ka World Toilet Day ha kaba ïa kane la ju pynlong ruh ïa ki program la jan manla u snem.
U la pynkynmaw ruh ïa ki jinglong jong ki por ba mynshwa ba ki briew ki dang leit rud ne leit paiñkhana ha ki rud ki kiar hynrei haba ïa nujor ha kine ki por ba mynta la kham ñiar ban ïohi ba ki briew kin leh ïa kata bad ki la sdang ban sngewthuh kumno ban pyndonkam ïa ki paiñkhana la ka long naduh kiba dang khynnah haduh kiba la heh la sah ruh, namar lada ki pyndonkam ïa ki ka lah ban tehlakam na ka jingsaphriang ki khñiang jingpang kiba long ka daw jong ka jingpynthut ïa ka koit ka khiah jong ka jingim briew.
U la pyntip ruh ba ki don ki lad jingïarap na ka bynta ki longïing bad kumjuh ruh kita kiba ïoh ïa ki ïing duk da kaba ki lah ban aplai ïa ki skhim paiñkhana lyngba ka ophis jong u Executive Engineer, PHE Mawkyrwat Division-cum-Member Secretary jong ka District Swachh Bharat Mission Grameen lyngba ka jingpynshisha na ki Secretary VWSC jong ki shnong.
U kyntu ïa ki paidbah ban lait na ka jingleit shabar pathar ka donkam ka long ka jingïatreilang jong ki shnong ki thaw da kin wad ki lad ki lynti ban pynshai ha ki paidbah ba ki lad jingïarap na ka sorkar ki don bad kim dei ban pynleh noh ei ïa ki.
Kiwei de kiba la ïa donlang ki long u Bah I. Lawrynïang, MCS, Block Development Officer, Mawkyrwat C&RD Block, u bah D.G. Nongsiej, DSEO, South West Khasi Hills District, u bah I. Kharbudon, SDO ka PHE Mawkyrwat Division, ki rangbah shnong, ki Secretary VWSC, lem bad ki nongtrei jong ka ophis PHE Mawkyrwat Division.
Ha kane ka sngi ka ophis jong u EE PHE ka la sam ïa ki work order ban shna ïa ki Segregation Shed/Store-age Shed sha ki 6 tylli ha Ranikor Block kaba kot T. 1.50 lak, katba ha Mawkyrwat Block 8 tylli kaba kot T. 1 lak tyngka kawei kawei.
Kumjuh ruh la sam ruh ïa ki Work Order sha ki Individual Household Latrine (IHHL) kaba dei jong ki New Emerging Household kaba dei ïa ki 386 unit bad Individual Household Latrine (IHHLs) jong ki PMAY sha ki 193 unit.
La sam ruh ïa ki syrnod sha ki lai ngut ki briew kiba dei ki nongtrei monsngewbha kiba la lah ban pyntyllun ïa ki kam ha ki shnong ki thaw halor ka khuid ka suba kata ka Kong Evelyne Thyrniang, u Bah Pynskhemborlang Shangdiar bad u Bah Handing Snaitang.
Ka ophis jong u Executive Engineer, PHE Mawkyrwat Division-cum-Member Secretary jong ka District Swachh Bharat Mission Grameen, South West Khasi Hills District kan sa pynlong ïa ka jingïakop dro dur ha ki jaka leit shabar ne ki paiñkhana bad ki nongjop kin sa ïoh ïa ki khusnam ryngkat ka syrnod.