Nongpoh, Naiwieng 19: Ka jingïalang hapdeng ki bor district bad shipai ha kaba ïadei bad ka thungkam shipai lyngba ka Agniveer Recruitment Rally na ka bynta ki samla ba la shah jied na ka jylla Meghalaya dang shen la pynlong ha conference hall jong ka ophis u DC, Ri Bhoi District haka jingdonlang u A. Baranwal, Deputy Commissioner, Ri Bhoi District, u Col Akshay Sati, Director Recruiting Assam & Meghalaya ha ryngkat ki ophisar na ki tnad sorkar ba dei peit. Ïa kane ka jingïalang thungkam shipai jong ka Agniveer la buh ban sdang naduh ka 10 tarik u Nohprah haduh ka 12 tarik u Nohprah 2024 ha Umroi Military Station na ka bynta ki samla ba la jied bad kiba la pyndep ïa ka common entrance exam jong ki kaba la long ha u bnai Ïaiong-Jymmang 2024.
Ha ka jingïalang la ïakren bniah ïa ki bynta bapher bapher kiba ïadei bad ka Agniveer Recruitment Rally kaban sa wan ha kaba naka liang u DC Ri Bhoi u la pynthikna ba ka jingïatreilang kaba pura na ka liang ka bor synshar district ba katei ka jingjied ïaki samla lyngba katei ka Rally kan long kaba jop ryngkat ka jingkyrmen ba ki khun samla jong ka jylla Meghalaya kin ïoh ka jingmyntoi lyngba katei ka sienjam ba ki shipai kila wanrah kyrpang na ka bynta ki khun samla jong ka jylla Meghalaya.
