Shillong, Nov 18 : Haduh 88 ngut ki Doctor na Meghalaya kila pyndep ïa ka jinghikai pyntbit kaba 6 bnai jong ka Training Programme kaba kyrpang ha Tamil Nadu, bad ïa kine ki doktor la pynkup burom dang shen.
Kane ka dei shi bynta jongka jingïatreilang hapdeng ki ar tylli ki jylla da kaba buh hakhmat ban kyntiew ia ka koit ka khiah ha ka jylla Meghalaya, khamtam ha ka ban pynduna ïa ka jingiap ki longkmie kiba pun khun bad ki khunlung.
Ha katei ka prokram ai jinghikai la pynleit jingmut ha ki buit treikam kiba kongsan kum ka Comprehensive Emergency Obstetric Care, Life-Saving Anesthetic Techniques bad Ultrasonography.
“Kane ka jingïatreilang kadei da ka jingdon ïa ka thong ban pynduna ïa ka jingiap ki longkmie kiba punkhun bad ki khunlung hapoh Meghalaya ka ban long hapoh ïa kaei kaba jia ha ka ri” la ong uwei u heh ophisar.
Ka Chief Minister’s Safe Motherhood Scheme (CM-SMS) ka dei kaba phai khmat ban ai jinghikai na ka bynta ban kyntiew ïa ka koit ka khiah jong ki longkmie kiba punkhun bad ki khunlung khamtam eh ha ki shnong kiba don ha nongkyndong. Kane ka jingïatreilang ka pyni ïa ka jingshimkhia jong baroh ar tylli ki jylla ban kyntiew ïa ka kam ai jinghikai bad ban sam mar kylliang ïa ki jingtip, ha kaba ki jaka sumar kiba pawnam ha Tamil Nadu kiba la.kiew shaphrang ha ka rukom ai jingsumar kila don ïa ka bynta kaba khraw ha kaban pynïaid shakhmat ïa katei ka kam.
La pynmih ïa katei ka sienjam lyngba ka jingïasoi ïa ka Memorandum of Understanding (MoU) ha u snem 2022 hapdeng ka Sorkar Meghalaya bad Tamil Nadu.
Hapoh jong katei ka jingïatehkular, ka Tamil Nadu kan pynbiang ha ka ban ai ïa ki jinghikai kiba kongsan na ka bynta ki doctor jongka Meghalaya ban pyndap ïa ka jingduna bad ban kyntiew ïa ki Community Health Centers (CHC) sha ki First Referral Units (FRU).
