Shillong, Naiwieng 17: Ka kynhun ïalehkai phutbol ba la rangbah jong ka Jylla Meghalaya kan sdang ïa ka lynti ïaid jong ka ha ka Senior Men’s National Football Championship jong ka Santosh Trophy 2024-25 pyrshah ïa ka Arunachal Pradesh ka ban long ha ka 20 tarik Naiwieng (kata lashai ka sngi).
Ha kaba ïadei bad kane, na ka liang jong ka Meghalaya Football Association ka la ïoh ban pynbna ïa ka thup jong ki 22-ngut ki dkhot ka kynhun ha kaba yn ïalam da u Bah Hering Shangpliang kum u Coach, katba u Fullmoon Mukhim kum u kapten.
Ka kynhun ïalehkai jong ka jylla ka la mih na Shillong hynne ka step sngi Nyngkong ban leit sha Nalbari, Assam, ha kaba yn pynlong ïa ki jingïakhun na bynta ka Group E.
“Haba peit ïa ka kynhun, Nga tip ba ngi don ïa ka lad kaba skhem. Kane ka long ka kabu ksiar ïa phi ban wanrah nam ïa ka Jylla bad ma Ngi ha ka MFA ngi don ka jingkyrmen kaba khraw ha phi,” la ong u Bah Hamlet Dohling haba ai khublei khadduh ïa ka kynhun shuwa ban leit ïakhun.
Hadien ka jingïalehkai kaba nyngkong pyrshah ïa ka Arunachal Pradesh (20 tarik Naiwieng), ka Jylla kan aireng sa ïa ka Nagaland ha ka 22 tarik Naiwieng bad nangta ïa ka Assam ha ka 24 tarik Naiwieng. Tang ka nongjop na ka Group ka lah ban jam sha ka wat ïakhun kaba bud.
Bun ki player ba la shah jied ki don la ka jong ka jingshemphang hynrei kiba don pat ka sap, kiba la pynkhreh na bynta ki jingïalehkai ki ban wan. Ki don ruh ka jingshemphang kaba biang ha ka jingïalehkai, ha kaba baroh ki la shah jied na ki klob jong ka Shillong Premier League 2024; lai tylli na kine ki klob ki dei ruh kiba ïakhun ha ka lympung jong ka MFA – ka Meghalaya State League 2024, kaba la pynsangeh shipor ban ailad ïa ki player ban ïoh ka por kaba biang ryngkatlang ban mihkhmat ïa ka Meghalaya.
Ka thup kynhun jong ka Meghalaya:
Goalkeepers – Siwel Rymbai, Rajat Paul Lyngdoh, Lambhamiki Lamare
Defenders – Wanboklang Lyngkhoi, Aibiam Mame Nongneng, Donborlang Nongkynrih, Overkindness L Mawnai, Badondor Marbaniang, Banraplang Pyngrope, Arlanky Nongsiej
Midfielders – Baiaikara Swer, Aenam G Jyrwa, Fullmoon Mukhim (C), Damanbhalang Chyne (VC), Farming Suting, Dibormi Kassar, Kevin Rymbai, Robertson Khongriah
Forwards – Donlad Diengdoh, Deibormame Tongper, Khrawkupar Jana, Owanijuh Pajuh
Meghalaya officials: Hering Shangpliang (Head Coach), Dapmon Tariang (Assistant Coach), Amit Rai (Goalkeeping Coach), Freddy Kharpran (Manager), Elderson Warbah (Physio)
