VAVEL USA, Jylliew 07: Ka jingïakhun hapdeng ka lahduh jong ka World Cup u snem 2018, kata ka France pyrshah ïa ka runners up jong ka World Cup ha u tei u snem ka Croatia ha ka lympung ïalehkai jong ka Nations League ka la kut ha ka jingïakhaid ha kaba baroh ar kynhun ki la ïoh ban khur mar shi point.
Ka jingïakhun hapdeng kine ki arliang mamla ka la kut ha kaba baroh arliang ki la ïoh ban ïa thep mar shi kol haduh kaba kut jong ka 90 minit.
Haba phai sha kane ka jingïalehkai, lah ban kdew ba ka jingïakhun ka la long kaba mar ïa ryngkatbor ha kaba baroh arliang ki kynhun ki la ïoh mar kylliang ki kabu ban pynkhihjar .
Hynrei kaba pynlyngngoh ka long ba ym shym la don mano mano na kitei ki kynhun kiba lah ban pynurlong ïa ka jingthmu ban ïoh pynkhihjar.
Kane ka jingbym ïohlad ban thep kol a la neh shi slem bad ka la bteng haduh kaba kut jong ka 45 minit bad kane ka la pynlong ïa ka jingïakhun jong ka kylla step ban ïakhaid da 0 kol.
Hadien ba la bteng biang ïa kane ka jingïakhun, na ka liang jong ka kynhun ïalehkai jong ka France ka la nang kham pynkhlaiñ shuh shuh ïa ka rukom ïalehkai jong ka hynrei na ka liang jong ki rangapdien ka Croatia ki la lah ban khanglad ïa ki katto katne ki kabu ka France ka la ïoh na kine ki jingpyrshang.
Kane ka jingïai bteng jong ki rangïalehkai ka France ban tur shakhmat ka seisoh ha ka minit kaba 52 hadien ba u Ben Yedder u la ïoh ban pynrung ïa ka bol kaba la leit sha u Adrien Rabiot bad thep ïa ka shapoh kol.
Da kane ka shi kol, ka France ka la ïoh ban lamkhmat ïa kane ka jingïalehkai kumba katto katne por.
Na ka liang jong ka kynhun ïalehkai jong ka Croatia ka la pyrshang ban thawlad da kumno ban ïoh pynphai.
Ka jing angnud jjong ki rangïalehkai ka Croatia ban ïoh pynphai ïa katei ka shi kol ka la neh shi slem bad kane ka la wan urlong hadien ba ka minit ïalehkai ka la jam sha ka 83 minit u Andrej Kramaric u la ïoh ban pynphai lyngba ka penalty kaba la pynïakhaid ïa ka jingïalehkai da mar 1 kol.
Ka jingïakhun ka la neh haduh kaba kut jong ka 90 minit khlem da don shuh mano mano ba ïoh pynkhihjar bad kane ka la pynlong ïa kine baroh ar kynhun ban ïasam mar shi point na kane ka jingïalehkai.
