Katno ka long ka khubor kaba sngewtynnad bad sngew don jingkyrmen ban ïohi ha ki mat khubor ba ka sorkar jylla ka la shim ïa ka rai ban pyni noh da ka bor ha ka jingïakhun pyrshah ïa u drok da kaba kan buh noh da ki jaka talasi ïa baroh ki kali kiba rung sha kane ka jylla khnang ba ki nongkhaii ne ki nongsuplai drok kin ym ïoh shuh ban rung laitluid katba ki mon. Namar ba ngi ïohi ha kine ki sngi ïa ka jingishyrkhei shisha jong ka jingsdang jyllei jong ka jingsniew kaba la saphriang kylleng ki bynta jong ka jylla ba ym shuh tang ha ki jaka sor hynrei wat ha ki jaka nongkyndong ruh ka la sdang ban prong lynti bad suhthied. Une u drok u long shisha u nongshun ba shyrkhei katta katta jong ka imlang sahlang bad buh ha ka jingsyier kaba khraw ïa kiba bun ki longïing longsem. Wat la baroh ngi tip ba kane ka jaidbynriew Khasi jong ngi ka dang long ka jaitbynriew kaba rit paid bad kaba tang shi trok ban ïanujor bad ki jaidbynriew heh paid ka ri India.
Shisha ka jingbymlah jong ka sorkar ban teh lakam ïa ka jingjyllei jong u drok ka la buh jingeh shibun ïa ki paidbah nongshong shnong jong ka jylla bad khamtam ha kane ka rilum Khasi jong ngi. Naduh kine ki khyndiat snem ki sengbhalang bapher bapher ki la pyrshang ban leh ei ei halor kane ka jingsniew jong une u drok bad ngi la sakhi bad mynta u snem ka seng HYC ka la ïeng radbah ban pynbna thma pyrshah ïa une u nongshun jong ka imlang sahlang uba la ktah haduh katta ïa ki khun samla ka jaidbynriew bad ruh pynsaja ïa kiba bun ki longïing kiba ki khun ki kti jong ki kila ngat ha kane ka bih seinïong kaba shyrkhei. Ka long kaba shisha ba dei tang kito kiba la mad jingeh kiba sngewthuh khambha haduh katno une u drok u ktah ïa ka jingim jong ngi ki briew bad ym tang shimet ïa kita kiba pyndonkam ïa u hynrei wat ïa ka longïing longsem hi baroh kawei.
Ka long kaba sngewtynnad ba tang da kaba pyndonkam ïa ki Mashin yn lah ban tip ïa ka jingdon jong uta u mar uba shyrkhei ne u drok, bad ki bor ba dei peit kin suk ban tohkit bad pynshitom beit tang ïa ki briew kiba ïadonkti bad kit ïa u khlem ktah ne pyndik ïa ki riew paidbah kiba lui lui kiba leit ba wan. Katno ka long kaba sngew dei ban pyrto shisha ïa ki riewstad kiba la lap bad lah ban pynmih ïa kiba kum kitei ki Mashin. Namar ba kumba ju long baroh shi katta ngi lah ban ïohi tang ïa ki Mashin kiba lah ban shek tang ïa ki jingdon jong ki tiar pynmynsaw ba lah ban kit ha ki met briew kumba ngi ju ïohi ha ka office trei kam jong ka Meghalaya Secretariat bad kiwei pat ki ophis sorkar kiba kham kongsan bad khmatam eh ha ki kad liengsuiñ.
Ha katei ka jingïalang jong ki heh sorkar la rai ba ïa kitei Mashin yn buh ha ki jaka talasi ba kyrpang ha ki bynta jong ka Ri Bhoi District bad kumjuh ruh ha East Jaintia kiba dei ki jaka rung jaka mih kiba kongsan tam ha ka jylla.Kine ki mashin kin lah ban talasi ïa baroh ki kali kiba ïaid lyngba bad ban pyni dak ruh lada don ki kali ba kit ïa ki kynja drok. La khmih lynti ba ha ki 5 bad 6 bnai yn sa lah ban pynurlong noh ïa kine ki jaka talasi. Khnang ba ka sorkar kan lah ban ïoh da ki briew la jong ne ki trai jylla ban trei ha kane ka kam, kan bha shibun eh bad ka sorkar kan phah pyntbit kyrpang noh da ki samla trai jylla khnang ba kan long ruh ka lad ai kam aijam bad ba yn lah ruh ba shakri ïa ka kam da ka jingkitkhlieh na ka bynta la jong ka ri bad ka jaidbynriew.
Ka jingshim khia ka sorkar ban pynkhlaiñ shuh shuh ïa ka jingtreikam jong ki Village Defence Party bad ïa ka aiñ Anti-Narcotic Task Force ba kan kham donbor bad kham bun briew ka long kaba kum ki paidbah ngi dei ban ai ka jingkyrshan bad ruh ka jingïaroh. Hooid kan long shisha ka jingkyrmen ban ïohi ïa kane ka jingshim khia jong ka sorkar ban ïaleh katba lah ban tem ïa kane ka jingsniew jong u drok. Namar shisha ka long ka jingangnud jong baroh ban ïoh ba ka jylla Meghalaya ka dei ka jylla kaba lait na ka jingsniew jong u drok bad ba ki khun samla jong ka jaidbynriew Khasi sa shisien pat kin lah ban ïohi ïa ka imlang sahlang kaba shngaiñ bad ka lawei kaba phyrnai. Hooid ngim lah ban len wat ka kyiad hi ruh ka la dei lypa kawei na ka thlen bah kaba bamduh ïa ka jaidbynriew bad kiba bun ki longïng ki ngat ha ki jingeh na ka daw jong ka jingkyrni dih kyiad jong ki dkhot jong kata ka longïing khamtam lei u kpa jong ka ïing, hynrei naka bynta kiba nang ban pyndonkam ïa ka kam dei kaba sniew kumba long u drok uba wei la pyndonkam te la jot beit !
