Shillong, Naiwieng, 15: U Vice-Chancellor jong ka skulbah NEHU u Prabha Shankar Shukla ha ka sngi Thohdieng u la mih na Campus wat hapdeng ka jingïakhih kaba jur jong ki samla pule bad pyntip ruh ba un shim da ka shuti.
Ka jingïakhih shah thngan ba khlem pud sngi ba la khot pynlong da ka North Eastern Hill University Students Union (NEHUSU) bad ba la kyrshan da ka Khasi Students Union (KSU) NEHU Unit ka la kynjoh mynta sha ka sngi kaba khatwei ha ka sngi Thohdieng ban dawa hiar shuki ïa u Vice Chancellor P.S Shukla bad ban weng na ka kam ïa u Registrar u Omkar Sing bad ïa u Deputy Registrar u Amit Gupta.
Ha ka shithi shim shuti, u Vice Chancellor u la pynpaw ïa ki ‘daw bym lah ban kiar’ ba un hap ban shim shuti.
U la pynpaw ba un mih na ka Campus da ka shuti Earned Leave (EL) ha ka 15 tarik bad ka jingshim shuti kan sdang biang naduh ka 17 tarik haduh ka 29 Naiwieng, 2024.
Shuh shuh u Vice Chancellor u la pyntip ruh u lah ban pynjlan ïa ka jingshim shuti jong lada u dang sngew donkam.
U Vice Chancellor u la pynpaw ruh ba ha ki sngi ba u la shim shuti, u Senior-most Professor jong ka skulbah u Prof. N. Saha, lane kiwei kiwei ki nonghikai ba la shah bynshet kam, kin shimti ban peit ïa ki kam jong u Vice Chancellor.
Ha ka shithi shim shuti, u Vice Chancellor u la thoh, “na ki daw ki bym lah ban kiar, ngan hap ban mih na Campus da ka Earned Leave (EL) naduh mynta ka sngi ka 15/11/2024. Ka jingshim shuti kan long naduh ka 17/11/24 haduh ka 29/11/24. Kata kaba lah ban nang pynjlan shuh shuh lada donkam. Ha ki sngi ba ngam don u Senior Most Professor jong ka skulbah (Prof. N. Saha lane kino kino) kin peit ïa ki kam jong u Vice Chancellor.”
Ka Ministry of Education jong ka India, ka la thaw da ka komiti ban tohkit ïa ki jingkynnoh ba don ka jingpynïaid bakla bad ki jingbym lah ban pynïaid ïa ki kam ophis hapoh ka skulbah.
Ha ka hukum, ka Ministry ka la pynbna ba ka la shim ïa kane ka rai, da kaba kdew, ‘ïa ka jingsngewkhia ba la pynpaw da ki samla pule, ki kynhun samla pule bad na ki khubor ba la mih ha ki lad pathai khubor.”
