Nongstoiñ, Naiwieng14: U bah Dominik Lyngkhoi uwei na ki rangbah jong ka shnong Mawlangdep West Khasi Hills kaba don harud jong ka surokbah National Highway 44 (E) Shillong-Tura, kaba long kumba shiphew kilomitar eiei na Nongstoiñ, u dei uwei na ki nongshna ïa ki tiar put tiar tem tynrai jong ka Jaitbynriew Khasi bad u dei ruh u ba don ka sap ba kyrpang ban thaiñ jingthaiñ da ki siej kum ki khoh, ki kriah, ki shang, ki knup bad kiwei kiwei.
Ha ka jingleit ïakynduh jong u nongthoh khubor ha ka ïing sah jong u Bah Lyngkhoi, u la ong ba naduh dang khynnah u ju smat bha ban shna ïa ki tiar tem tynrai kum ka duitara, ka sitar, ka marynthing, ki ktang ban put ba la shna na u siej kum ka besli, ka tang lot bad kiwei kiwei, namar u dei u ba sngew tynnad bad u ba ieid bha ïa ki jingrwai tynrai, kiba pynkynmaw ïa ki por ba myn hyndai bad u ju sngewtynnad ruh ban pyndonkam ha kaba put ïa ka besli bad tang lot ha ka por ba u dang ap masi.
Haba u la san la rangbah u ju smat bad u da minot thop ym tang ban shna ïa ki tiar kiba la pyni nuksa da ki long shuwa, hynrei u la wad jingtip bad lum thup ruh ïa ki jait jingtem tynrai ryngkat ki kyrteng kiba la duh jaitnoh ha kane ka pateng kaba mynta.
Ka jingminot thop bad ka jingtrei shitom da kaba wad ruh lyngba ki jingthoh, ka la pynlong ïa u ba un lap sa ïa kiwei pat ki jait jingtem tynrai kiba la duh jait noh kum ka ka sitara bad ka jait ksing kaba ki riew hyndai ki khot kyrteng ka ksing damma.
U la pynshai ruh katto katne halor ka jingpyndonkam jong ki riew hyndai ba katei ka ksing damma, ka dei kaba ki Syiem hyndai ki pyndonkam ban tem ïa ka shuwa ba kin mih ban leit ïaleh thma bad ha ka por ba ki tem ïa katei ka ksing Damma, ki shipai jong ki Syiem kiba la khreh ban leit tur sha ka thma ki shad ki kmen, ki rwai ki siaw bad ki phawar bun rukom.
U la ong ruh ba katkum ka jingwad jingtip bniah jong u, ki Syiem kiba pyndonkam khatduh eh ïa ka ksing Damma, u dei u Syiem ka hima Myrïaw bad ka hima Rambrai, namar ba ha ka por ba u sahep David Scott u don ha Ri Khasi, u Syiem ka hima Myrïaw bad u Syiem ka hima Rambrai, ki ïa ïeng tylli lang kawei ban ïaleh thma pyrshah ïa ki shipai Phareng. Hynrei ki la shah rem noh bad haduh mynta ki don bun bah ki shnong bad ki jaka kiba u Syiem ka hima Myrïaw bad u Syiem ka hima Rambrai ki ïa synshar lang.
Haba kylli naduh ba u la sdang ban shna ïa ki tiar tem tiar put ryngkat bad ka jingpyndonkam ïa ka sap ka phong kaba u don ha kaba rwai ba siaw, ka tem ka put, u la ju shah khot ne em ban rwai ban siaw bad ban leit tem leit put ha kino kino ki jaka, ki jingïa pyni sap, na ka liang u Bah Lyngkhoi u la ong ba tang hapoh ka jylla u la shah khot haduh shiphew sien bad ka kynhun jong u ka la ïoh ban rah ruh ïa ka nam lahduh ha kawei na ki lympung ïa pyni sap ha ki jingtem jingput bad rwai ïa ki sur tynrai kaba la long ha nongbah Shillong.
Nalor kata u la ong ruh ba shabar ka jylla pat u la shah khot haduh san sien bad u la shah khot ruh ha Rashtra Pati Bhavan New Delhi ha ka jingïakop ban pyni ïa ki tiar tem tiar put tynrai.
U la ong ba wat la ma u ryngkat bad ka kynhun ki la ïoh lad la bun sien ban leit ïashim bynta ha ki lympung pyni sap ha ka tem ka put bad ka rwai ka siaw ha ki sur tynrai. Hynrei na ka liang ka sorkar kam shym pat la ai jingïarap na ka bynta ba un nang pynbun shuh shuh ïa ki tiar tem tiar put tynrai. Pynban u la ïoh katto katne ka jingïarap na ka Department of Art & Culture, tangba kam pat biang na ka bynta ban shna ïa ki jaka buh ïa ki tiar ki tar ba kin lait na ka jingjot jingpei.
U la ong ruh ba u la pyrshang ruh ban thoh ïa kawei ka kot ban pynshai kumno ban pyndonkam ïa ki jait tiar ba u la shna, la ki dei ki ktang ban put bad ki tiar ban tem ryngkat bad ki kyrteng jong ki.
Hynrei, na ka liang ki nongpynïaid jong ka Martin Luther University ka skul bah kaba peit ïa ki bynta kiba ïadei bad ki tiar tem tiar put tynrai bad kaba ju ai jingïarap ruh ha kaba ïadei bad katei ka bynta, ki la ong ba ka jinglut ka la kot palat ïa ka shilak tyngka. Kumta kam lah shuh ban bei pisa bad mynta u la hap ban ïeng ha la ki kjat bad un ïalehkatba lah ban pyndep ïa katei ka kot.
Khatduh eh u bah Lyngkhoi u la kyntu ïa ka sorkar, ba kan thaw ki lad jingïarap na ka bynta ban buh noh ïa ki jaka ban tyngkai bad pynsah nam ïa ki trai tem tiar put tynrai ha la ki jong ki jong ki district, khnang ba kan pynsuk ïa kito kiba don ka sap ka phong ban shna bad ban pydonkam ïa ki.
