Shillong, Jylliew 6 : Ka ïing bishar High Court jongka jylla mynta ka sngi ka la pynwai noh ïa ka mukotduma Public Interest Ligigation (PIL) halor ka jingtwa jong u Dome ha ka ïing dorbar thawaiñ Assembly kaba thymmai ha Mawdiangdiang, New Shillong.
Ha ka hukum ka ïing bishar ka la rai “ Namar ba ka dei ka kamram jongka sorkar jylla ban ai ka jingpynsaja ïa ki nongtei halor kane ka jingtwa lehse na ka daw ka jingtrei torti ne bym biang ka rukom ohdur, ka ïing bishar kam sngew dei namar kata ban leh kyrkieh ïa ka kam khlem da ailad shwa ïa ki bor ba dei peit ban leh kat kum ka aiñ.
Na kata ka daw ïa kane ka mukotduma PIL la pynwai noh shwa tangba lada don kino kino kiba kwah ujor hadien ruh ki lah ban leh ïa kata lada ki bor sorkar ba dei peit kim lah ban leh ïa kaba donkam. ïa kane ka mukotduma la ujor da u Pawan Sharma. La pynpaw ruh da ka ïing bishar ba ka don ruh ka High Power Committee ka ban peit ïa kane ka kam.
