Shillong, Jylliew 06: Ka jingjia ha nongbah Jowai ha kine ki sngi baladep namar ka jingbym lah ban pynkhuid ïa u ñiut bad ki jaboh jabaiñ, ka la pynkyndit bynriew ïa kiba bun ba ka donkam kyrkieh ka jingpyrkhat thymmai ha kaba ïadei bad ka jingkhuid ïa ki jaboh na ki ïew ki hat ne ki ïing briew.
Mynta ka sngi, u Syiem ka Hima Sohra, u Pa’iem Freeman Sing Syiem, u la ai sngewbha ka jaka kaba 2 akar sha ka Clean Sohra Campaign (CSC) na ka bynta ban shna ïa ka Waste Recovery Centre ne ban pynkylla sboh bad ban pynkylla sha kiei kiei kiba pynmyntoi ïa ki paidbah.
Katkum ka jingïathuh u Bah Allan West, Chairman jong ka CSC, kane ka jaka kadei kaba don ha Mawkyrdup, kaba don ha jaka lum ha ka lynti ban leit sha Kshaid Daiñthlen bad ïa ka jingpynkhreh na ka bynta ka jingpynbit pynbiang ïa kane ka jaka, kynthup ruh ïa ki kor ki bor bad kiwei kiwei de ki jingdonkam la aiti ha ki briew kiba la tbit bad kiba la ju mlien ïa kane ka kam ha ryngkat ki jingpynkhreh ïa ki jingdonkam ne ka Detailed Project Report (DPR) ban phah sha ki bor kiba dei ban bei tyngka na ka bynta kane ka Centre.
Ka jingaiti ïa kane ka jaka ka long da kaba ai ïa ka kot khyndew da u Syiem ka Hima, u Pa’iem Freeman Sing Syiem ha u Bah Allan West ha ka jingïalang kaba la long ha ïingdorbar Shnong Mawkdok, kaba la pynlong ruh ka jingrakhe ïa ka sngi pynneh bad sumar sukher ïa ka mariang.
U Bah Allan, u la ong ba kumba long mynta namar ka jingbym don ka jaka kaba kum kane, ki paidbah Sohra ki shu theh kulmar ïa ki ñiut bad ki jaboh jabaiñ sha ki lum ki wah bad ki krem ki kroh.
“Kane kadei ka sngi ban sah kynmaw na ka bynta ki paidbah ka thaiñ Sohra, ha kaba lada pyntreikam ïa kane ka Centre kan don ka jingpynïakhlad ïa ki ñiut kiba mih na ki Shnong bapher bapher ha Sohra”, la ong u Bah Allan.
Ha kane ka jingïalang ban aiti ïa ka jaka lyngba ka kot khyndew, la ïadon lang ruh u Syiem Khynnah ka Hima Sohra, ki Myntri ka Hima bad ki rangbah na Mawkdok.
Ha kane kajuh ka sngi, u Syiem ka Hima Sohra, u la kaweh lama ïa ka Royal Enfield Bike Rally na Mawkdok, kaba ka jingthmu jong kane ka rally ka long ban ban pynkhuid ïa ki lynti ki syngkien ryngkat ka jingïatreilang ka CSC bad ka Hima Sohra. Nalor ka RERAM bad ka PNAR Bull, la ïashim bynta ruh ki khynnah NCC na Rama Krishna Mission. Wat hapdeng ka jingjur u slap, hynrei baroh ki la ïashim bynta ha ka jingpynkhuid da ka mynsiem ka jingkmen bad ka jingkitkhlieh.
