Shillong, Jylliew 06 : U MLA ka HSPDP ba dei ruh u Myntri sorkar ka jylla, Bah Renikton Lyngdoh Tongkhar ha ka sngi Nyngkong u la pynpaw ka jingsngew skhem ba ka sorkar synrop jong ka MDA kan bteng biang wat hadien san snem.
“Ka sorkar MDA kan sa wan biang, kata hadien ka elekshon 2023 ruh. Hynrei ka jingkylli ka long mano pat ban ïalam ïa ka sorkar,” u la ong haba kren bad ki lad pathai khubor.
Da kaba ïaroh ïa ka rukom treikam jong ka sorkar jylla hapoh ka jingïalam jong u Myntri Rangbah Conrad K Sangma, utei u MLA ka HSPDP u ong ruh ba u kwah ban ïaroh hakhmat baroh ba u dei u briew uba sngewrit bad kumta u pynpaw ruh ïa ka jingkhmih lynti ba un lah bantrei kam bha lada u ïoh biang ïa ka lad ha ka samoi kaba ar.
Tangba u ong pat ka shong ha ki nongïalam ka NPP la kin dang ailad neem ïa u Conrad ba un bteng kum u CEM lane kin jied noh da uwei pat na rilum Khasi – Jaiñtia.
Haba jubab pat halor ka jingkylli, u Bah Renik u ong ba ym pat ju don ka sorkar kaban lait na ka jingshah kynthoh kaba harukom khamtam haba ïadei bad ka bamsap.
