Nongpoh, Naiwieng 12: U MDC barim jong ka Mawhati Constituency u Bah James Sylliang ryngkat bad ki nongkyrshan ha ka sngi Baar ki la leit ban pynïasoh ïalade sha ka United Democratic Party (UDP) shuwa ka jingpynkhreh ïa ka elekshon MDC ha ka jingïalang kaba la long ha Shilliang Umdoh, ha Ri-Bhoi District.
Ïa u Bah Sylliang la pdiang burom sha ka iing jong ka UDP da u Working President ka State UDP u Bah Titosstarwell Chyne ha ka jingdonlang jong u Vice President ka UDP u Bah Mayral Born Syiem uba dei ruh u MLA ka Nongpoh, u Bah Balajied Ranee uba dei u President ka UDP RI-Bhoi bad MDC ka Nongpoh, u Bah Michael Kharhunai uba dei u Secretary ka UDP Ri-Bhoi lem bad kiwei kiwei ki nongkitkam bad ki nongïalam ba hakhmat jong ka party.
Lyngba ka jingleit pynïasoh jong u Bah James Sylliang sha ka UDP, ki nongïalam bad ki nongkitkam ka party UDP na Mawhati Constiteuncy ki la ibit ruh ïa u Bah James Sylliang ban long kum u kyrtong na ka UDP ha ka elekshon MDC ban sa long na Mawhati Constituency bad wat na ka liang ki heh nongïalam jong ka party ki la kubur ba u Bah Sylliang u long shisha uba la ibit ban aireng ïa ka elekshon MDC na Mawhati Constituency ha kaba ïa ki kyrteng jong ki kyrtong yn sa pynbna shen da ka UDP.
Haba kren ha ka jingïalang, u Bah Titos Chyne u la ong ba ki paidbah ki dei ban tip ïa ka jingshisha namar kum ka party hi kan ym ïalam bakla ïa ki paidbah bad ka UDP ka sngewkmen halor ka jingwan pynïasoh jong u Bah James Sylliang ban pynkhie im biang ïa ka UDP ha Mawhati Constituency. U la banjur halor ka jingïai neh ha ka party, namar lada u Bah James un jop kum u MDC ka UDP na Mawhati kyrmen ba un ïai neh ha ka party bad ban ym kylla jutang.
U Bah James Sylliang haba kren ha ka jingïalang u la ïathuh ba ka jingpynïasoh sha ka UDP ka long namarba u ïohi ïa ka rukom synshar ha District Council ha ka por ba u Bah Titos u la long kum u Chief Executive Member (CEM) haba ïohi ïa kane ka rukom treikam u sngewhun bad kwah ban don noh bad ka party bad dei hadien ka jingïakren bad u President ka UDP Mawhati Block u la pynïasoh sha ka UDP namarba u don ka jingthmu ban ïakhun MDC beit na Mawhati Constituency.
U la ong ruh ba mynshuwa u don ha ka PDF ban don bynta ruh ban seng ïa ka PDF bad u la ïakhun ruh ïa ka elekshon MLA ha u snem 2018 na ka PDF, hynrei u la kynnoh ba dei tang na ka daw ka party u la rem noh ha ka elekshon bad dei na kata ka daw um poi shaei shaei ruh ha ka jingïaleh namar ka dei ka party kaba dang shu mih bad bun na ki paidbah kim sngewthuh sngewthaw halor ka nongrim bad ka jingtreikam jong ka party.
Ha ka elekshon MDC ba ladep u Bah Sylliang u la ïakhun kum u kyrtong shimet, hynrei u la rem biang namarba ki paidbah kim ithuh ithaw hynrei ha kane ka kynti ba mynta u la mih biang shakhmat ban ïakhun biang ïa ka elekshon MDC.
