Khlem ïa syllok ka VPP ha shwa ban ai tiket ha ka elekshon MDC, kynnoh u Bah Baitlang

Shillong, Naiwieng 12: U Bah Baitlang Pohsngap ha ka sngi ba-ar u la pynbna ba u la shim ïa ka rai ban ïakhun ïa ka elekshon MDC kum u kyrtong shimet napoh ka Jowai South constituency ha ka elekshon ka ban long na ka bynta ka Jaiñtia Hills Autonomous District Council (JHADC).
Ïa kane ka rai u la shim hadien ba u la shah pynduh tiket na ka seng Voice of the People Party (VPP).
Haba kren sha ki lad pathai khubor na ka liang jong u Bah Pohsngap u la ong ba ka VPP ka khlem da ïa syllok bad ki paidbah jong ka Jowai South ha shwa ban ai ïa ka tiket na ka bynta ban iakhun ia ka elekshon MDC.
“Kaei kaba pynsngew phylla ïa nga ka long ba kim don satia wat ïa la ka jong ka Unit, kim don satia ïa ki Circle bad ki khlem da la ïasyllok bad ki nongshong shnong jong ka Jowai South hynrei ki la ai tiket pynban ïa u kyrtong ba la jied hi da ma ki,” kynnoh u Bah Pohsngap.
Na ka liang jong u Bah Pohsngap u la ong ba ka jingthmu jong u ban ïakhun ïa kane ka elekshon MDC ka dei halor ka jingkwah jong u ban wanrah ïa ka khuid ka suba bad ban ïada ïa ka jylla khamtam ïa ki nongshong shnong jong ka West Jaiñtia Hills na ka jingshah ktah jong ka jingwan rung kyrthep jong ki bar jylla.
“Kumba ka long mynta ka jylla bad khamtam kane ka thaiñ ka la long kum ka ïing khlem ki jingkhang, khlem ki kynroh ha kaba ki briew ki lah ban rung bad ban mih katba mon. Lada ki nongshong shnong ki jied ïa nga ngan shim khia ban ïada na ka jingwan rung kyrthep ki bar jylla sha kane ka thaiñ bad khamtam eh ha ka jylla baroh kawei,” u la bynrap.