Jowai, Naiwieng 11: Hadien ka jingkyrpad na ki katto katne ngut ki Kmie ki kpa jong ki khynnah skul ki bym pat ïoh Scholarship haki skul bapher bapher na ka liang ka HANM West Jaiñtia Hills hapoh ka jingïalam u President u samla Wankishwa Mawlong ha ryngkat ka jingïatreilang bad ka JYF Jowai Circle hapoh ka jingïalam jong u samla Clifford Shylla President mynta ka sngi kila leit ïa kynduh ïa ki katto katne tylli ki skul ha ka jingïadei bad kane ka jingbym ïoh Scholarship ki khynnah skul.
Kine ki nongïalam jong kine ki seng ki la ong ba kawei na ki skul ki bym pat ïoh Scholarship ka dei Ka St. Paul English Secondary School Mookaswan.
Haba kren bad une u Principal jong kane ka skul ula ong ba namar ba ki dang shu shim kti ïa kane ka skul ki dang don shibun ki bynta kiba ki hap ban pynthymmai bad ha ka jingïadei bad ka jingbym pat ïoh Scholarship ki khynnah ula ong ba na ka liang ka skul kan sa pyrshang ban leh ïa kaba donkam khnang ba kan long ka jingkyrkhu ïa ki khynnah kiba pule ha kane ka skul.
Kine ki nongïalam jong kine ki seng ki la kyrpad ïa ki skul bapher bapher ki bym pat ïoh Scholarship ba kin sngewbha ban pynbiang ïa ki kot ki sla kiba donkam khnang ba ki samla pule kin ïoh ban Apply ïa ki Scholarship kaba long kawei na ki lad ban ïarap ïaki ha ki kam pule jong ki.
