Shillong, Naiwieng 11: U Samla Kevin Nelson Wanrap Rani uba dei u samla pule jong ka Skulbah NEHU u la pynpaw ïa ka jingsngewsih ba wat hadien ba la tam ki sngi jong kane ka jingïakhih kaba la palat shi taïew ym don satia kiba shim khia bad na ka liang u VC ruh u la shim bad kheiñ dew thala bad um kheiñ snep ïa ki jingdawa ki riewlum halor kine ki mat ba la buh.
U la ong ruh ba u VC u kheiñ 3rd class ïa ki riewlum naba u dalade hi ula wan na ka jaitbynriew ba heh paid ne Caste system ha kaba ha kane ka jylla kam shym la don kata ka Caste system bad kane ka jingleh jong u ka la long kumba u la kheiñ ba ki riewlum ki dei ki briew kiba la shah kheiñ poh.
U la ong ruh ba kane ka jingïakhih ka la pynlong ïa kiba bun ki samla pule ba kin shah kit sha ki jaka sumar bad wat hadien ba ki la poi sha hospital ruh kim shym la treh wat ban bam wat tang shi symboh u khaw ruh bad haba peit ïa kine ki para samla kiba shah thngan ka pyndap da ka mynsiem kaba sngew kthang haba ïohi bad ki shah thngan.
U la ong ruh ba ka jingwan ban ai jingkyrshan jong kiba bun ha kane ka jingïakhih shong shah thngan ka la ai mynsiem bha bad la kyrmen ba ki bor ba dei peit kin khot hajir ïa une u VC bad ban tohkit halor kine ki jingjia khnang ba ki samla pule kin pynkut noh ïa kane ka jingshah thngan naba ki la ju ïai ong ba ki samla pule ki dei ka lawei jong ka ri.
Na ka liang jong u ula ong ba nangne shakhmat ka sorkar pdeng ka dei ban phah ïa ki briew kiba sngewthuh ïa ki jingim jong ki paid riewlum ym ban shu phah kulmar naba kane kan lah ban ktah ïa ka lawei jong ki samla pule ha kane ka skulbah.
