Shillong, Naiwieng 09: Ka ICAR-Krishi Vigyan Kendra (KVK) kaba don ha West Garo Hills ka la shem ba bun na ki briew jong ka district ki long kiba duna ban ïoh ïa ka bam kaba tei met, ha kaba ka daw kaba kongsan kadei na ka jingleh bym suitñiew jong ki briew halor ka jingdonkam ban bam ïa ki jhur ha ka por ba ki bam ja.
Haba kdew ba ka jingmut jong ka jingdonkam ban thung ïa ki jhur batei met ha ki kper, kaba thmu ban sam ïa ki jhur kiba donkam manla ka sngi ha ki ïing ki sem dei ban pynrung hapoh ka jingmut jingpyrkhat jong ki briew.
Kumta ha kaba ïadei bad kane na ka liang ka KVK ka la pynlong ïa ka jingai jinghikai halor ka jingdonkam ban don ïa ka nutritional garden ka ban pyndap ïa ka bam bad ïa kane ka jingai jinghikai la pynlong ha shnong Aminda Rangsa.
Ïa kane ka prokram la pynlong hapoh ka jingïalam jong u Dr. Joyoshree Mahanta, CTO (Plant Pathology) ha kaba la ïashim bynta da kumba 53 ngut ki nongrep na kylleng ki saw tylli ki shnong kiba kynthup ka shnong Aminda Rasngsa, Aminda Simsang, Allabagre bad Nengja Bolchugre.
La don ruh ki jingïasyllok halor ki jingeh ba la mad da ki longkmie kiba rep ba riang ba kumno kin lah ban pynurlong ïa kine ki nutritional garden. La sam ruh ïa ki symbai jingthung bapher bapher kiba kynthup ïa u symbai Kubi, u bit (beetroot), u kajor, u sohsaw, garden pea, french bean, spinach, lettuce, cole crop, chill, sohbaingon ïong (brinjal), dwarf dolichos bean, bad kiwei kiwei kiba la sam ruh hapoh kane ka project.
Ha kane ka prokram la batai ruh ïa ki nongrep lyngba ki ktien ba kumno kin pynsan ïa ki symbai bad la ai ruh sha ki da ki yellow sticky trap ban ïakhun na ki jingshah bam khniang ki jingthung.
Halor kane na ka liang ki nongrep ki la pynpaw ïa ka jingai khublei ïa ka KVK ba ka la sam ïa ki symbai jhur kiba la thmu ban kyntiew ïa ki jingbam kiba tei met na ka bynta ki jingdonkam hapoh ki longïing longsem bad kumjuh ruh ka jingkyrshan ïa ka ïoh ka kot bad ka jingkiew ha ki thaiñ nongkyndong.
