Shillong, Naiwieng 08: Ka jingïakhih ki samla pule ka NEHU ka la poi sha ka sngi kaba saw ha kaba u Vice Chancellor jong ka North Eastern Hill University (NEHU) u Prof Prabha Shankar Shukla ha ka sngi Thohdieng u la khot ka jingïalang kaba kyrkieh jong ka Executive Council ban ïakren halor ki kam ba la sngewkhia ba la pynpaw da ka North-Eastern Hill University Students’ Union (NEHUSU).
Ïa kane ka jingïalang la khot kum ka jingpyrshang ban pynbeit noh ïa kine ki jingeh ba la wanrah da ka NEHUSU, kaba kynthup ïa ka jingweng kam noh ïa u Registrar bad ïa u Deputy Registrar bad ka jingdawa ban thung ïa ki arngut ki Pro-Vice-Chancellor na ka bynta ka NEHU Shillong bad ka Tura campus.
Ha u kyrwoh ba la phah sha ki lad pathai khubor, u Vice Chancellor u la ong, “na ka daw ka jingshah pynthut ha ki samla pule kiba pyrshah, ïa ka jingïalang Executive Council ym shym la lah shuh ban pynlong. Kane ka la khanglad ïa ki bor pynïaid jong ka skulbah ban ïaid shakhmat ban ïakren halor ki jingdawa jong ki samla pule.”
Halor kane u VC u la kyrpad ïa baroh ki samla pule ban wan sha ka miej jingïakren khnang ban dup lah ban shim ïa ka rai ban pynbeit ïa ki jingdawa jong ki.
Kane ka jingïakhih jong ki samla pule ba la lamkhmat da ka NEHUSU bad ba la kyrshan ruh da ka Khasi Students’ Union (KSU – NEHU Unit) ha kine ki saw sngi ka la lam sha ka jingkhang dam ïa ka skulbah NEHU halor ka jingkynnoh ïa ka jingbym lah jong u Vice Chancellor u Prof PS Shukla ban pyndam noh ïa ka kam Registrar bad Deputy Registrar (Academics) ha kaba la kam ba kane ka jingthungkam la kynnoh ba ka dei kaba be-aiñ.
Haba pynpaw ka jingsngewkhia na ka bynta ka bha ka miat ki samla pule, u Prof Shukla u la ong, “nga la pyrshang ban don ka jingïasyllok bad ki samla pule ban ïa pynbeit ïa kine ki kam bad ban kyrpad ïa ki ban sangeh noh kane ka jingshah thngan, namarba nga da sngewkhia jur ba ka lah ban ktah ïa ka koit ka khiah, kumta da ka jingai jingmut jong ki Magistrate la bthah ïa nga ban kiar na ka jingleit jngoh ïa ki katto katne ki jaka na ka daw ki lad jingïada.”
U Prof Shukla u la banjur ban pynleit jingmut na ka bynta ban wad ïa ki rai kiba tei hynrei khlem ka jingïakren kane kan ym lah ban longkam.
U la kyrpad ïa ki samla pule ba kin sangeh noh kane ka jingshah thngan bad ban ïashim bynta ha ka jingïakren kaba don jingmut khnang ban lah ban pynkut noh ïa kane ka jingeh.
“Nga da kyrpad rit ïa ki samla pule lyngba ki lad pathai khubor ban sangeh noh kane ka jingshah thngan bad ban treilang bad ngi ban shim ïa ka rai kaba biang lang ïa baroh. Khlem ka jingïakren ki kti jong nga ki long kiba la shah teh,” u la bynrap.
U Vice-Chancellor u la pynthikna ïa ka jingkut jingmut jong u ban khmih ïa kine ki jingsngewkhia ki samla pule bad kyrmen ba tang da ka jingïakren kaba lah ban pynkut noh ïa kine ki jingsngewkhia baroh.
