New Delhi, Naiwieng 06 : Ka kynhun Myntri jong ka Sorkar Pdeng ba la khlieh da u Myntri Rangbah Duh, Narendra Modika la ai jingmynjur ïa ka skhim PM Vidyalaxmi, ka skhim ba thymmai jong ka Sorkar Pdeng kaba thmu ban ai jingïarap pisa ïa ki khynnah pule ba leh bha khnang ba ki jingeh ha ka pisa kimkhang lad ïa ki samla jong ka India ba kin ioh ïa ka jingpule kaba kham halor kaba bha.
Ka PM Vidyalaxmi ka dei sa kawei ka sienjam kaba wan na ka National Education Policy, 2020, kaba la ai jingmut ba dei ban ai jingïarap pisa ïa ki khynnah pule ba leh bha lyngba ki lad bapher bapher ha ki jaka pule ba kham halor jong ka Sorkar bad jong ki kynhun shimet.
Hapoh ka skhim PM Vidyalaxmi, ki khynnah ba ioh pule ha ki jaka ai jinghikai ba kham halor ki ioh lad ban ioh ïa ka ram ka bym donkam buh bynda bad kaba ym donkam nongkyrshan na ki bank bad ki kynhun kiba trei ha ki kam pisa ban pyndap ïa ka bai pule bad kiwei kiwei ki jinglut jingsep kiba ïadei bad kane ka jingpule. Kane ka skhim ka dei ka ban pynïaid ha ka rukom kaba suk, kaba shai bad kaba ïarap ïa ki khynnah pule ka ban ïaid lyngba ki lad digital.
Ka skhim kan trei ha ki jaka ai jinghikai ba kham halor kiba hakhmat tam jong ka ri, kumba la buh kyrdan NIRF – ba kynthup ïa baroh ki jaka ai jingpule ba kham halor, jong ka Sorkar bad jong ki kynhun shimet, kiba don ha ki 100 kyrdan ba halor tam jong ka NIRF, ki jaka ai jingpule ba kham halor jong ki Sorkar Jylla kiba don ha ki kyrdan 101-200 ha ka NIRF bad baroh ki jaka ai jingpule jong ka Sorkar Pdeng. Yn pynthymmai ïa ka thup man u snem da kaba pyndonkam ïa ki kyrdan NIRF bad ha kaba mynta yn sdang da ki 860 tylli ki jaka ai jingpule ba kham halor, ha kaba 22 lak ngut ki khynnah pule ki lah ban ioh jingmyntoi na ka skhim PM-Vidyalaxmi; lada ki kwah ïa kane.
Na ka bynta ka jingshim ram kaba haduh T 7.5 lak, ki khynnah kin ioh ïa ka jingpynskhem kaba 75% na ka jingshim ram. Kane kan ai jingïarap ïa ki bank ba kin pynbiang ïa kine ki jingshim ram ïa ki khynnah pule hapoh kane ka skhim.
Ha ryngkat kane, ki khynnah kiba wan na ki longiing kiba kamai haduh T 8 lak ha ka shi snem ki bym ioh jingmyntoi na kanokano ka scholarship Sorkar na ki skhim pynduna sut, yn pynbiang ka jingpynduna sut kaba 3% na ka bynta ka jingshim ram haduh T 10 lak. Kane ka jingpynduna sut ka dei ka ban ai ïa shi lak ki khynnah pule man u snem. Yn ai shuwa ïa ki khynnah kiba pule ha ki jaka ai jingpule jong ka Sorkar kiba la jied ïa ki jingpule technical / professional. La buh lypa T 3,600 klur ha u 2024-25 haduh 2030-31, bad la antad ba kumba 7 lak ki khynnah pule kin ioh jingmyntoi na kane ka jingpynduna sut ha kane ka por.
Ka tnad Higher Education kan don ïa ka rynsan “PM-Vidyalaxmi” ha kaba ki khynnah pule ki lah ban buh application ban ioh ïa kane ka jingshim ram na ka bynta ka jingpule bad ka jingpynduna sut, lyngba ka rukom buh application kaba suk ka ban pyndonkam da baroh ki bank. Ka jingsiew ïa ka jingpynduna sut ka dei ka ban leh lyngba ka E-voucher bad ki Central Bank Digital Currency (CBDC) wallet.
Ka PM Vidyalaxmi kan pyndonkam ïa ki jingjop jong ki sienjam ba la wanrah da ka Sorkar India ha kine ki 10 snem ba la dep kiba ïadei bad ki kam pule bad ki jingai bynta ïa baroh ha ki kam pisa, ban kyntiew ïa ka jingioh lad ïa ki khynnah ba kin ioh ïa ki jingpule ba kham halor. Kane kan ïaid lang bad ka Central Sector Interest Subsidy (CSIS) bad Credit Guarantee Fund Scheme for Education Loans (CGFSEL), ki ar tylli ki skhim hapoh ka PM-USP, kiba pyntreikam da ka Tnad Higher Education.
Hapoh ka PM-USP CSIS, ki khynnah pule kiba wan na ki longiing kiba kamai haduh T 4.5 lak kiba da pule ïa ïa ki jingpule technical / professional ha ki jaka pule ba la ioh jingithuh ki ioh ïa ka jingpynduna sut na ka bynta ki jingshim ram haduh T 10 lak na ka bynta ki jingpule. Kumta, ka PM Vidyalaxmi bad ka PM-USP kin ïatrei ryngkat ban ai ka jingkyrshan kaba pura ïa baroh ki khynnah pule kiba leh bha khnang ba kin ioh ïa ki jingpule kiba kham halor.
