La plie ïa ka ‘Muay Thai Martial Arts Coaching Camp’ ba nyngkong eh ha ha Sngap Syiem College, Mawkyrwat

Mawkyrwat, Naiwieng 06: Ka long kaei kaei ka kam ka ban sah jingkynmaw ha ka khana ne ha ka history hapoh ka Sngap Syiem College, Mawkyrwat ha kaba ha ka 06 tarik u Naiwieng, 2024 la ïoh ban plie pyrda ïa ka Muay Thai Martial Arts Coaching Camp kaba nyngkong eh hapoh South West Khasi Hills District, Mawkyrwat.
Lah ban kdew ruh ba kane ka jingplie ïa ka ‘Muay Thai Martial Arts Coaching Camp’ ka dei ruh kaba nyngkong eh ban don ha ki jaka pule ba ki khynnah ne ki samla kin ïoh ban ïashimbynta bad kan long shisha ka jingaimynsiem bad pynshlur ïa ki ym tang ha ka pule puthi hynrei wat ha ki kam ïalehkai sports.
Shuh shuh watla ka Sngap Syiem College, Mawkyrwat kaba dei tang ma ka ka shlem ai jinghikai ïa ki samla pule hapoh ka South West Khasi Hills District hynrei la sakhi ba ka la long kawei na ki skul bah ba don ïa ki jingthmu ba bha ïa ki samla pule la ka long ban pynïoh ha ki ïa ka jingnang jingstad ha ki kot pule bad kham kyrpang ruh ban rah ïa ki samla ha ki kam ïalehkai bapher bapher.
Ha ka jingïalang ba lyngkot, la ïoh jingkren na u bah A. Sun, President jong ka Muay Thai Association, Meghalaya ha kaba u la ïathuh ïa ka jingïaid lynti jong u ha kane ka Muay Thai Martial Arts da kaba u la sdang nyngkong ïa lade da kaba u la leit ban hikai kilanmet hapoh Thailand bad hapoh ka Jylla Meghalaya pat ïa kane ka Muay Thai Association (MTA) la sdang ha u snem 2016. Ym tangkata, hadien ba la dep ban seng ïa ka hapoh ka Jylla la ïoh ban pynlong ïa ki lympung jingïakop kaba dei jong ka National Level ha NEHU, Shillong ha kaba haduh 19 tylli ki jylla ki la wan ban ïashimbynta.
“Ka Muay Thai Association, Meghalaya ka la don bynta ne snohlang bad ka United Mauy Thai Association of India (UMTAI) ha kaba ïa kane la pynlong da ki 28 tylli ki jylla hapoh ka Ri India bad kane ka UMTAI ka la don ka jingïasnohktilang bad ka International Federation Muay Thai Association (IFMA) kaba don ïa ka pdeng jingtreikam hapoh Thailand ha kaba la pynlong ïa kane da ki 142 tylli ki ri ha ka pyrthei”, ong u bah Sun.
Namarkata, u la ai mynsiem na ka bynta ki samla pule hapoh jong ka Sngap Syiem College, Mawkyrwat ba haba ki shim ïa kane ka bynta ban long kiba shah hikai ha ka ‘Muay Thai Martial Arts’ kim dei ban kheiñ ba ka long tang kum ka tamasa hynrei ki dei ban shimkhia namar kan long ka jingïarap na ka bynta jong ki ha ki sngi ki ban sa wan. “Lada ki poi sha ka thong jong ka jingïakop ha ki jingïakop ha ki sngi ki ban sa wan, ki samla kin sa ïoh jingïarap lyngba ki skhim bapher bapher ba ka sorkar ka la dep ban bhah kyrpang”, u la ïathuh.
Ha kajuh ka por u la kyntu ruh ïa ki samla pule ba ki dei ban don ka mynsiem jong ka jingthrang ba kiew ha ki kam ïalehkai da kaba kin don ka jingngeit ha lade khnang ba kin poi sha ka thong jong ka jingjop.
Ha kane ka jingplie pyrda ïa ka Muay Thai Martial Arts Coaching Camp la ïa donlang naduh u Dr. K.K. Nongsiej, Principal jong ka Sngap Syiem College, Mawkyrwat, u babu S. Ramsiej, Professor jong ka Philosophy, u babu R. Turnia lem bad ki samla pule kiba don jingthmu ban shah hikai ha ka Martial Arts.