Shillong, Jylliew 6 : U Myntri ba dei peit ïaka tnad Public Health Engineering (PHE) u bah Renikton Lyngdoh Tongkhar u la pynpaw mynta ka sngi ba ka tnad PHE kan sa pyndep ha u Nohprah ban pynpoi umdih sha ki 5.32 lak ki long ïing kat kum ka skhim Jal Jeevan Mission (JJM).
“ Ngi la buh thong ban pyndep ïa kane kane ka projek JJM kumba la buh thong da ka sorkar ha u Nohprah. Wat la ngim pat ïa bishar bniah haduh katno ka kam ka la ïaid hynrei ngi kyrmen ba ngin lah beit ban pyndep kumba la buh thong” ong u bah Renikton.
U la ïathuh ba ki don 5.32 lak ki longïing kiba la mang ban pynïoh umdih bad ka kam ka la ïaid shaid shaid shakhmat. Kan long ka jingjop kaba khraw ynda la lah ban pyndep lut nadong shadong ïa kane ka projek.
U la ong ruh ba ka dang long kloi eh ban ong ba kane ka skhim ka la pheil bad ïa kane ula kynthoh halor ki jingkynnoh ka All India Trinamool Congress (AITC) ba ka sorkar kan ym lah ban pyndep ïa kane ka skhim JJM hapoh u snem 2022.
U la ong ym lah ban len, ka long kaba shisha ba ka jingpynpoi umdih sha ki ïing ka long kat haduh mynta 40 % bad 60% kiba dang sah hynrei ym dei pat ban shu pynkut da kaba ong ba ka sorkar kan ym lah namar ka kam ka la nang ïaid shaid shaid ban pynpoi umdih sha man la ki thliew ïing. U la ïathuh lyngba kane ka skhim ka sorkar ka la rai ruh ban pynïadon bynta lang ruh ki bor shnong bor thaw ban peit bad sumar ïa ki tyllong umdih.
