Shillong, Jylliew 06 : Ka Shillong City Congress Committee kaba kynthup ïa ki hynñiew tylli ki Block Congress ha ka sngi Nyngkong ka la ïatai sani bha halor ka jingkyrduh ka ki samla bad ruh halor ka dheng kali kaba ktah jur ïa ka nongbah baroh kawei.
Haba kren bad ki lad pathai khubor hadien ka jingïalang, u Working President ka MPCC Bah PN Syiem uba la shah jied ruh kum u Chairman jong ka SCCC u la ong ba ka jingïalang ka sngewkhia haduh katta katta halor ka jingjur palat ka dheng kali. “Halor kane, ngi la shim ïa ka rai ban pynlong da ka rynsan phylliew jingmut bad ka jingïasyllok bad ki riewshemphang kiba don jingtbit ha katei ka laiñ khnang ban ïoh jingmut bad ruh ban ïoh ïa ka jubab kumno ban weng noh ïa katei ka jingeh,” u la ong.
La ïathuh ruh ba ka Committee ka sngewkhia ruh haduh katta haba ïadei bad ka jingkyrduh kam kyrduh jam ki samla ym dei eh tangba kim ïoh ïa ki kam sorkar hynrei ruh ka jingbym don lad wat ban sengkam seng jam lajong.
“Kumta, ngi la rai ban pynlong da ki prokram ai jinghikai da kaba wallam da ki kynhun kiba tbit na kylleng ka India kiban hikai halor ki lad ïohkam ïohjam bad ruh kumno ba kin lah ban seng kam lajong.”
Ka bynta kaba kham kongsan ba kum ka kynhun ki ïa kren kadei ban pynkhlaiñ ïa ka Committee khamtam mynta ha ka jingpynkhreh ïa ka elekshon MLA kaban sa long shen ha u snem ban wan.
Ka jingïalang ka la rai ruh ban pan ïa ka kaiphod treikam na baroh ki Block Congress khnang ba kin ïoh ban buddien bad pynkhreh pat ïa ka elekshon ha la ki jong ki constituency.
La jied ruh ha kane ka sngi ïa u Bah PN Syiem kum u Chairman ka Committee, nangta ïa u Bah Marbud Dkhar kum u Working President, Bah Robert Khongwir bad i Kong Nilufer Laloo kum ki Vice President, Bah Edward Ryntathiang kum u General Secretary, Kong Sukhi Pariat kum Assistant GS bad ruh i Kong Mebaailang Kharkongor kum i Treasurer.
