Nongstoiñ, Naiwieng 5: Ki lai tylli ki shnong kiba don ha ka thaiñ rimen ka Marshiang, Umïong bad Mawdong ki dei ki shnong kiba don ha kyndong eh jong ka Rambrai Jyrngam Constituency bad kiba jngai bha bad ka don tang kawei ka surok kaba poi haduh Mawdoh, Synia bad Nongthymmai.
Ki nongshong shnong na kitei ki lai tylli ki shnong haba ki leit donkam ha Rambrai lane Nongstoiñ bad kiwei kiwei ki jaka, ki hap ban ïaid da ka kjat kumba lai haduh saw kynta haduh ban da poi ha ka jaka ba katei ka surok ka don. Ka jingbym don ïa ka surok ka la buh ïa ki paidbah ha ka jingeh kaba khraw, khamtam eh ïa ki longkmie lada ki thmu ban leit phah sumar ha ka por ba ki ar met. Nangta haba don kiba pang ba shitom kiba la hap ban kit sha ki Hospital.
Ha kaba ïadei bad katei ka jingeh, ki nongïalam ka Federation of Khasi Jaiñtia & Garo People Rambrai Circle, ki la ong ba ka seng ka sngewkhia jur halor ka jingiehnoh khunswet jong ka sorkar ïa kitei ki shnong. Imat ka sorkar ka ñiew ba ki paidbah jong kitei shnong kim dei ki briew, hynrei ki dei tang ki shrieh ki tngaw lymda kumta balei kan shu iehnoh beiñ haduh katto.
Ki nongïalam bad ki dkhot jong ka seng, ki la lap bunsien ba ïa kiba pang ba shitom kiba thmu ban leit phah sumar ha Rambrai PHC, ha kaba la hap ban shu kit da u briew naduh shnong haduh ban da poi ha surok.
Wat haba la poi ha surok ruh ki shem jingeh haduh katta katta ban ïoh kali, namar ki kali kiba mih na Synia, Mawdon bad Nongthymmai ki la dap briew lypa. Teng teng lada dei ki shynrang la hap ban kyntiew noh sha tnum kali tang ban lait na kaba kit da u briew.
Shuh shuh, la ong ruh ba kaba shem jingeh palat ka dei ïa ki longkmie kiba ar met namar ban kit da u briew ruh ka shitom bha. Nalor kata baroh ki paidbah jong kitei ki shnong ki dei kiba im tang da ka rep bad ki mar rep ba kongsan kum u synsar, ki soh ki pai, ka kait bad kiwei kiwei ki donk kyrhai. Hynrei, wat lada ki nongrep ki trei shitom katno katno ruh bun ki mar rep ki shu sep ei namar ka jingbym don surok.
La ong ba ki la don ki surok ha ki shnong kiba la pyntrei lyngba ka skhim shispah sngi. Hynrei namar ba ki dei ki surok khyndew tang mar ïa poi ka aïom slap, kim i dei shuh ki surok bad ym don ki kali kiba lah ban ïaid lait noh tang ha ka por tlang kata ruh tang ki trok Four Wheel.
