Shillong, Naiwieng, 05: Ka jingkhmih lynti jong ki nongrep ban ïoh ot noh ïa u kba uba la sdang ban ih sa tang katto katne sngi, hynrei kyndit kynsan ha sngi Baar u phria bad u lapbah uba jur u la hap ha ki katto katne ki bynta jong ki district ka rilum Khasi bad Jaiñtia.
Ha West Jaiñtia Hills, u phria u la hap ha ki katto katne tylli ki shnong, kata, ha Lad Demthriang, Lad Muphlang, Pynthorlangteiñ terter shaduh ki bynta jong ka shnong Mynkjai ka jaka bret ñuit barim jong ka Jowai Municipal Board (JCB) lyngba ka surok Jowai Amlarem Dawki NH-40 E.
La ïathuh ba u slap bad u phria ki la wan hap ha ka por 2:30 baje noh sngi eiei bad u la neh tang katto kane por.
La sakhi mynta kiba bun ki jaka ki la shah tap ha u phria kumjuh ki bynta jong ka surok National Highway, wat ka jinglong jingman jong ka suiñ bneng mynta ka sngi ha nongbah Jowai bad ki shnong ba marjan ruh ka la long kaba khriat shaba palat namar ka jingdum jong ka suiñ bneng.
Kane ka jinghap jong u phria ha kitei ki bynta khappud jong ka War Jaiñtia ka la jingpynjulor katto katne ki jingthung jingtep, khamtam ïa u kba uba la shah ktah jur namar ba la dei ka por ban ot noh.
Ki paid nongrep ha ka thaiñ Mustem ruh ki la pyntip ba ka jinghap jong u phria ka long kaba la jur bha haduh ba ki symboh kba ki la hap lut.
Kane ka jingkhyrwit jong u phria ka la jia ruh ha ki thaiñ Nongspung bad Pyndenglitha, East Khasi Hills District kaba la jia ha ka por 12:30 baje eiei mynsngi.
Haba pyntip sha u Mawphor, ki nongrep ki la ïathuh ba ka jingther jong u phria ka la pynhap lut ïa u kba uba la ih bad la jan dei artad ka por ot.
“Baroh ki jingkyrmen ban ïoh lum kham bun u kba mynta u snem ki la bijai lut,” ong uwei na ki nongrep.
Ha Eastern West Khasi Hills District u phria u la lynshop ha ki katto katne tylli ki shnong bad pynjulor ruh ïa u kba ba ki nongrep ki la ap khmihlynti ban ot sa tang katto katne sngi.
Ki nongrep na ka shnong Nongthymmai bad na ka shnong Maroid ki la pynpaw ïa ka jingsngewsih halor ka jingwan lynshop jong u phria bad ki la kyrpad ïa ka tnat ka Koit ka Khiah ka Sorkar Jylla ban ïarap lem ïa ki nongrep katba lah ei namarba ki la ngat ha ka jingwan lynshop jong ki bor ka mariang.
Ki la ong ruh ba ka pynthor kaba ki ju ïoh 30 byrni u kba manla u snem hynrei na ka jingwan lyngshop jong u phria uba jur kim tip shuh la kin dang ïoh neem wat tang 3 ne 4 byrni u kba mynta u snem.
