Shillong, Naiwieng, 05: Ka Sorkar Jylla ka la mynjur ban thung ïa u Chairperson jong ka Zilla Sainik Welfare Officer, Tura bad ïa u Chairperson jong ka Real Estate Regulatory Authority.
Haba kren sha ki lad pathai khubor hadien ba la wai ka jingïalang, u Myntri ka Sorkar Jylla Bah Paul Lyngdoh u la ong, “ngi la mynjur ïa ka jingjied ïa u Chairperson jong ka Zilla Sainik Welfare Officer, Tura. La mynjur ïa ka kyrteng jong u Col Daryl Hopkins da ka Selection Committee ban jied ïa u Zilla Sainik Welfare Officer, Tura na ka bynta ka samoi treikam kaba san snem. Mynta u la dap 52 snem bad ngi la mynjur ban thungkam ïa u na ka bynta 5 snem kum u Zilla Sainik Welfare Officer, Tura.”
U la ong ba ka Kynhun Myntri ka la mynjur ban thung ïa u Chairperson na ka bynta ka Real Estate Regulatory Authority.
“La tyrwa ïa ka kyrteng jong u Bah BK Lyngwa, u ophisar IFS ba la shongthait uba dei ruh u PCCF barim bad ka kynhun Myntri ka la mynjur ïa ka kyrteng jong u,” ong u Bah Paul.
Ka Sorkar Jylla ka la mynnjur ruh ban thaw ïa ka Meghalaya Rural Development Services Recruitment Board (MRDSRB).
Ïa ka jingtyrwa jong ka Community & Rural Development (C&RD) la wanrah ha ka jingïalang ba la pynïaid da u Myntri Rangbah ka Jylla u Conrad K Sangma na Tura.
Haba kren sha ki lad pathai khubor, u Bah Paul uba dei ruh u nongaitktien jong ka Sorkar Jylla u la ïathuh ba ka jingthaw ïa ka Meghalaya Rural Development Services Recruitment Board kan ïarap ïa ki kam jong tnat C&RD, ha kaba la tyrwa ban thung ïa ki ophisar lyngba ka Expert Committee lane ka Board.
“Ki dkhot kin dei kiba la pyndep ïa ka jingpule Post Graduate. Yn jied ïa ki lyngba ka jingpynlong ïa ki eksamin bad ban thungkam ha ki Block kum ki Junior Rural Development Officers,” u la ong.
