Khliehriat, Naiwieng, 05: Ki nongïalam jong ka Hynniewtrep Integrated Territorial Organisation (HITO) Lakaseiñ Unit ryngkat ka jingsynran lang ki nongïalam ka HITO, East Jaiñtia Hills District ha ka sngi Baar ki la leit ban ïakynnduh ïa u Sub Divisional Officer (SD) jong ka Meghalaya Power Distribution Limited (MePDCL) Khliehriat da kaba kyntu ïa ka tnat ba ka dei ban bujli noh ïa ki nar post electrik ba la bam sarang ha ka shnong Lakaseiñ bad ha baroh ki jaka kiba hap hapoh ka Elaka Bri Sumer namarba ki la buh jingma ïa ka jingim briew bad ïa ki mrad ruh kumjuh.
Ha ka dorkhas ba la aiti ha u SDO ka MePDCL, Sub Division Khliehriat ba la soi da u President jong ka HITO East Jaiñtia Hills District u bah Deibormi Rymbai bad u General Secretary u Bah Affirming Pakem, ka seng ka la pynpaw ïa ka jingsngew khia namarba ki nar post electrik kiba la bam sarang bad kiba la jan khyllem ki don ha ki shnong bapher bapher hapoh ka Elaka Bri Sumer.
Ka seng ka kyntu ruh ïa ka MePDCL ba ka dei ban shna noh da ka jingker ïa ka jaka ba buh ïa ki Transformer ha ka shnong Lakaseiñ, Mooriap, Umkyrpong, Kseh, Pala, Mooknor, Khahnar, Larket, Samasi, Shyrwang, Mynthing, Mynthlu, Kremmyrsiang.
Haba pynpaw ïa ka jingsngewkhia ki nongïalam ka HITO ki la ong, “kumba ngi la ïohi ba ki la don ki jingjia kiba sngewsih namar ka jingsynjor jong ki nar post electrik bad ka jingbym ker ïa ki jaka ba buh ïa ki transformer kin buh jingma ïa ka jingim briew bad ïa ka jingim jong ki mrad.”
