Shillong, Naiwieng 01: Ka district unit jong ka A’chik Holistic Awakening Movement (AHAM) ka la aiti ïa ka shithi jingujor sha u Deputy Commissioner ka South West Garo Hills haba ïadei bad ka jinglong jingman jong ka surok kaba la sniew na Ampati sha Purakhasia ka surok lyngba ka Salmanpara bad ka surok Ampati sha Mirjulmala ka surok kaba ïaid lyngba ka Latri.
Kine ki surok ki long kiba kongsan na ka bynta ki nongshong shnong jong ka South West Garo Hills hynrei ki la julor bad sniewbha bad ki la dap tang da ki thliew bad ka donkam ïa ka jingmaramot kaba kyrkieh.
Ka seng AHAM ha ka shithi ba la phah sha u DC ka la ong ba kine ki surok ki long kiba kongsan na ka bynta ban ai ki jingshakri kum ha ka koit ka khiah ki lad ai jingsumar, ka pule puthi bad ka ïohkam ïohjam bad ka shakri ïa ka jingim jong ki hajar ngut ki nongshong shnong bad kumjuh ruh kiba bun tylli ki shnong.
Ka jingsniew palat jong kine ki surok ka la wanrah ka jingma ïa ki nongshong shnong, khamtam ha ki por ba thut bha ka jinglong ka suiñbneng, ka la bynrap da kaba kyrpad ïa ka tnat ba dei peit ban sdang noh ïa ka kam maramot ïa baroh kine ki surok.
