Shillong, Risaw 31: Ka Sorkar jylla ha ka sngi Palei ka la pynkupburom ïa u nongthoh khubor ba la rim u Bah Francis A. Khongwar, uba long ruh u nongthoh khubor ba laitluid ne independent journalist, namar ki jingnoh synniang ba kordor jong u sha ki kam lad pathai khubor ha ka jylla.
Na ka liang u Chief Secretary ka Meghalaya, u Bah D.P. Wahlang, IAS, u la aiti ïa ka cheque kaba T. 1 lak sha u Bah Khongwar kum ka dak ka jingburom halor ki kam shakri ba khlem shongthait jong u. Lah ban kdew hangne ba ka sorkar Meghalaya, lyngba ka Directorate of Information and Public Relations, Shillong, dangshen ka la pynkupburom ïa kumba 7 ngut ki nongthoh khubor kiba la ih bha ha ka kam ki lad pathai khubor ha ka Meghalaya Media Meet 2024 kaba la pynlong ha ka Hotel Vivanta, Shillong.
Ha kane ka jingïakynduhlang u Myntri Rangbah ka jylla u Conrad K. Sangma u la pynbna ki lad jingïarap pisa kaba long mar T. 1 lak sha manla iwei pa iwei na kine ki 7 ngut ki nongthoh khubor kiba la ih bha, da kaba ithuh ïa ki kam ba kongsan ban pynwandur ïa ki paidbah bad ki lad ai jingtip sha ki nongshong shnong ka Meghalaya.
Ïa u Bah Francis A. Khongwar la ithuh halor ki jingïaid lynti jong u ha ka kam thoh khubor ha ka snem 1984 uba la long u reporter jong ka Khasi weekly newspaper “Dongmusa.” Hadien pat u la pynïasoh ban trei noh hapoh ka Press Trust of India, Shillong, kum u Transmission Operator. Ha ki snem ba la leit noh u la noh synniang ha kiba bun ki lad pathai khubor kynthup ïa ka Apphira, Nation Builder, Mawphor, Kynjat Shai.
Kat haduh mynta u Bah Khongwar u dang ïaibteng ban shakri ha ka kam thoh khubor da kaba pynleit jingmut ruh ha ki kam kiba long ka jingshisha bad kaba shit ba shai.
